मलखं कयाः न्याम्ह सित

येँ (सन्ध्या टाइम्स)/थीथी थासय् मलखं कयाः न्याम्ह मनू सीगु दुसा मेपिं छुं घाःपाः जूगु दु। दांगया हापुर गाविसया सपना चौधरी म्हिगः बहनी बुँइ ज्या यानाः छेँय् लिहां वनाच्वंगु इलय् मलखं कयाः घाःपाः जूगु खःसा वासः यायेत घोराही हयाच्वंगु इलय् लँय् तुं मदुगु खः। दांगया हे मानपुर गाविसय् मलखं कयाः शोभाराम चौधरी सीगु दु। चौधरी वासः यायेगु झ्वलय् अस्पतालय् सीगु खः ।

उखे झापाय् छम्ह सीगु दुसा स्वम्ह घाःपाः जूगु दु। मलखं कयाः वस्तु जः वनाच्वंम्ह उल्फो गणेश सीगु खःसा सुरेश गणेश व छुनछुन गणेशया लिसें मेम्ह छम्ह घाःपाः जूगु खः। घाःपाः जूपिनि स्थानीय स्वास्थ्य केन्द्रय् वासः जुयाच्वंगु दु।
अथे हे नुवाकोटय् नं मलखं कयाः छम्ह सीगु दु। नुवाकोटया उत्तरी पश्चिमया चतुरा गाविसय् कमला तामाङ मलखं कयाः सीगु खः ।

उखे तेर्‍हथुमय् नं मलखं कयाः धर्म बानियाँ सीगु खः।