सूर्य ग्रहणय् थ्वःगु ख्येँचय् चन्द्र व सुर्द्यःया छाप !
किपू (सन्ध्या टाइम्स)/ वंगु सूर्यग्रहण कुन्हु ग्रहण जुयाच्वंगु इलय् हे खां थ्वःगु ख्यें छगः थौंकन्हय् किपुली चर्चाया विषय जुयाच्वंगु दु ।
अबलय् खां थ्वःगु ख्येँचय् छखे सुर्द्यः व मेखे चन्द्रमाया किपा दुगु जुयाच्वन। स्थानीय क्वाच्वय् च्वंम्ह उरु महर्जनं लहिनातःम्ह खां उगु ख्यें थ्वःगु खः। सूर्यग्रहण कुन्हु थ्वःगु व ख्येँचय् नं चन्द्र-सूर्यया हे 'छाप' दुगुलिं उगु ख्यें तमछ्यासे तयातःगु खः ।
आः ख्यें अथें तया तयेगु पलेसा द्यःयात छायेगु धकाः थौं स्थानीय क्वाःच्व गणेद्यःयात उगु ख्यें छाना बिउगु दु।
न्हाय्कं दुगु बट्टाय् बांलाक तयाः छाःगु उगु ख्यें स्वयेत आः किपूया आपालं मनूत उगु देगलय् वयाच्वंगु दु ।
