परियत्ति ब्वंपिंत दसिपौ इन
ख्वप (सन्ध्या टाइम्स)/अखिल नेपाल भिक्षु महासंघपाखें न्ह्यानाच्वंगु नेपाल बौद्ध परियत्ति शिक्षा २५५२ या परियत्ति जाँचय् ताःलाःपिं ब्वमिपिंत मुनि विहारय् दसि पौ लःल्हात।
विहारया केन्द्राध्यक्ष रामकृष्ण वैद्यया सभापतित्वय् जूगु ज्याझ्वलय् ख्वपया जिल्ला शिक्षा अधिकारी निरा शाक्यं सिरपाः लःल्हानादीगु खःसा ताःलाःपिं विद्यार्थीपिंत भिक्षु थानसोठो महास्थविरं दसिपौ लःल्हानाबिज्याःगु खः।
परियत्ति केन्द्रपाखें भिक्षु निग्रोधं परियत्ति शिक्षाया महत्व व आवश्यकतायात कयाः धर्मोपदेशना बियाबिज्याःगु खः। मैत्रेय युवा संघया तीर्थराज वज्राचार्यं वार्षिक प्रतिवेदन न्ह्यब्वयादिलसा संजय शाक्यं आर्थिक प्रतिवेदन न्ह्यब्वयादिल। ब्वँमिपिनिपाखें सुलोचना कोजू, विद्या शाक्य व प्रमिला धाख्वां नं नुगः खँ प्वंकादीगु ज्याझ्वलय् तुलसीकाजी मानन्धरं सुभाय् देछानादिल ।
पञ्चशील प्रार्थना यानाः न्ह्याःगु थुगु ज्याझ्वलय् भिक्षु आनन्द लगायत मूपाहां शाक्यं नं थःथःगु नुगः खँ प्वंकादीगु खः ।
