छन्हुं हे नेप्से २७ अंकं थहां वन
येँ (सन्ध्या टाइम्स)/वंगु स्ववाः न्ह्यःनिसें मदिक कुहां वनाच्वंगु नेप्से परिसुचक म्हिगःया कारोबारय् सुधार जुयाः छन्हुं हे २७ अंक थहां वंगु दु। थनिं स्ववाः न्ह्यः राष्ट्र बैंकं जारी याःगु न्हूगु मौद्रिक नीति लिपा छन्हु जक थहां वंगु नेप्से वयां लिपा दिपाः हे मकासे लगातार कुहां वनाच्वंगु खः ।
नेप्सेय् म्हिगःया ख्वीस्वंगू कम्पनीया कारोबार जूगुली पीखुगू कम्पनीया शेयर भाः थहां वंगु दु। अथे हे खुगू कम्पनीया कारोबारय् छुं हिउपाः वःगु मदुसा झिंछगू कम्पनीया शेयर भाः कुहां वल। थुकिया लिसें नेप्सेय् ताः ई लिपा परिसुचकया लिसें दक्वं उपसूचक नं सुधार जुयाः थहां वंगु दु ।
म्हिगः कारोबार जूगु दक्वं वाणिज्य बैंकया शेयर भाः थहां वनेवं नेप्से नं २६ दशमलव ९८ अंकं थहां वनाः ७१७ दशमलव २ अंकय् ग्यंगु दु। अथे हे छन्हु न्ह्यः कारोबारय् सुधार जूगु सेन्सेटिभ म्हिगः १० दशमलव १२ अंकं थहां वंगु दुसा फ्लोट नं २ दशमलव ९३ अंकं थहां वन ।
उखे म्हिगः कारोबार जूगु उपसूचकय् ताः ई लिपा वाणिज्य बैंक समुह दकलय् अप्वः ४५ दशमलव ५७ अंकं थहां वनाः ७६२ दशमलव १३ अंकय् थ्यन। लिसें विकास बैंक समुह ९ दशमलव ६३ अंकं थहां वनाः ७३२ दशमलव २३ अंकय् थ्यंगु दु। आपालं उतार चढाव जुयाच्वनीगु जलविद्युत समुह ११ दशमलव १८ अंकं थहां वनाः ९५५ दशमलव ८१ अंकय् थ्यन। छन्हु न्हयः कुहां वःगु विमा समुह नं १ दशमलव ४६ अंकं थहां वनाः ६४८ दशमलव ६३ अंकय् थ्यंगु दुसा फाइनान्स समुह नं २ दशमलव १४ अंकं थहां वनाः ६८२ दशमलव ३ अंकय् थ्यंगु दु ।
नेप्से लिसें म्हिगः शेयर कारोबारया संख्या नं थहां वनाः छगू लाख चय्द्वः खुसः व निगू कित्ता शेयर न्याये-मी जुयाः झिंस्वंगू करोड न्हय्च्यागू लाख पीखुद्वः तका दांया कारोबार जुल। म्हिगःया कारोबारय् नं नेशनल हाइड्रो पावरया दकलय् अप्वः ३२ हजार ८२० कित्ता शेयर न्याय-मी जुल।
प्रति कित्ता शेयरय् ५४२/- तका थहां वंगु स्टायण्डर्ड चार्टर्ड बैंकं दांया ल्याखं नं दकलय् अप्वः निगू करोड नीस्वंगू लाखया कारोबार याःगु दु। कारोबारया ल्याखं धाःसा नविल बैंकं दकलय् अप्वः कमे यात ।
