पुलांम्ह जुजुं कार सहुलियतया माग
पुलांम्ह जुजु ज्ञानेन्द्र शाहं थः सत्ताच्युत जुइधुंकूगु ईलय् थःगु नांमय् दुगु करया वक्यौता पुलेगु धासें सहुलियतया माग याःगु दु ।
ज्ञानेन्द्रया निजी सचिवालयं अर्थ मन्त्रालययात छगू पौ छ्वयाः निर्मल निवासं येँय महानगरपालिकाय् पुलेमाःगु कर, आयकर, विजुली व टेलिफोनया विलय् सहुलियतया माग याःगु खः । पौलय् गथे यानाः कर पुलेगु धकाः स्पष्ट यायेत नं इनाप यानातःगु दु ।
बुधवाः अर्थ मन्त्रायलय् आर्थिक पत्रकारत नाप खँल्हाबंला यानादिसें अर्थमन्त्री सुरेन्द्र पाण्डें पुलांम्ह जुजु ज्ञानेन्द्रं सुविधा माग याःगु आशय कथं पौ छ्वगु धयादिल । वयेकलं राज्ययात कर पुलेत पुलांम्ह जुजु सहमत जूगु वयेक नाप 'विशेष व्यवहार' यायेगु धयादिल ।
थ्वस्वया न्ह्यः येँय महानगरपालिका, विद्युत प्राधिकरण, नेपाल टेलिकम लगायतं कर व आश्यक शुल्क पुलेत निर्मल निवासयात ताकेता याःगु खः ।
