सुजाताया नेतृत्वय् संयन्त्र ?
येँ (सन्ध्या टाइम्स)/उच्चस्तरीय राजनीतिक संयन्त्र दयेकेत च्वंगु स्वंगू दलया बैठकय् परराष्ट्र मन्त्री सुजाता कोइरालाया नेतृत्वय् संयन्त्र दयेकि धकाः कांग्रेस सभापति गिरिजाप्रसाद कोइरालां निर्देशन बीवं संयन्त्र दयेकेगु ज्या हे छखे लाःगु खँ सूत्रं धाःगु दु ।
थनिं छुं न्हि न्ह्यः कोइराला निवास महाराजगञ्जय् च्वंगु कांग्रेस, एमाले व माओवादीया शीर्ष नेतातय् बैठकय् सभापति कोइरालां उगु निर्देशन बियादीगु खः ।
सूत्रया कथं बैठकय् कांग्रेस सभापति कोइराला, एमालेपाखें प्रधानमन्त्री माधव नेपाल व माओवादीपाखें अध्यक्ष प्रचण्डं हे बैठकय् ब्वति काःगु खः। बैठकय् कोइरालां अज्याःगु प्रस्ताव तयादीवं प्रम नेपाल व अध्यक्ष प्रचण्डं उकियात अस्वीकार यानादीगु खः ।
सभापति कोइरालां न्हापा थःगु हे नेतृत्वय् संयन्त्र दयेकेगु धया वयाच्वंगु खःसां लिपांगु इलय् वयाः धाःसा सुजाताया नां प्रस्ताव यायेवं माओवादी व एमालेया नेतात अजूचाःगु खः।
बैठकय् प्रम नेपाल व विपक्षी नेता प्रचण्डं कोइरालाया नेतृत्व थःपिंत स्वीकार दुसां हैसियत मदुम्ह सुजाताया नेतृत्व धाःसा स्वीकार मदु धकाः बैठक त्वःतादीगु खः ।
