संघर्ष समितिपाखें राष्ट्रपतियात पौ
येँ (सन्ध्या टाइम्स)/राष्ट्रपतिपाखें अभिव्यक्त जुइगु छुं नं धापू छुं खास पुचःया पक्ष व विपक्षी जुइ मजिउ धासें थौं नेवाः स्वायत्त राज्य मंकाः संघर्ष समितिं राष्ट्रपति डा. रामवरण यादवयात छगू ज्ञापनपत्र लःल्हात ।
संघर्ष समितिया सचिव नरेश ताम्रकारं हस्ताक्षर यानाः लःल्हाःगु उगु ज्ञापनपत्रय् नेपाःया हे न्हापांम्ह राष्ट्रपतिया रुपय् सम्मानित जुयाच्वंम्ह राष्ट्रपतिं समसामयिक राष्ट्रिय मामिलाया विषयय् प्वंकीगु बिचाः व धापू मुक्कं देय्या निंतिं हे अर्थपूर्ण जुइ धासें न्हूगु संविधान च्वयेगु ज्या न्ह्यानाच्वंगु इलय् स्वायत्तता सहित संघीय नेपाःया रुपय् राष्ट्रया पुनर्संरचना यायेगु खँय् राजनीतिक पार्टीतय् दथुइ राष्ट्रिय सहमति कायम जुइधुंकूगु अवस्थाय् थीथी कथंया अवधारणा वइगु स्वाभाविक जूगु खँ न्ह्यनातःगु दु ।
ज्ञापनपत्रय् नेपाःया आदिवासी समुदाय स्वशासन सहित जातीय स्वायत्त राज्यया पक्षय् वकालत याना वयाच्वंगु खँ राष्ट्रपतिं सिउगु हे जुइमाः धासें नेपाःया छगू मू आदिवासी नेवाःतय्सं नं प्राचीन नेपालमण्डल दुने नेवाः स्वायत्त अधिकार कायेगु निंतिं सडक आन्दोलन याना वयाच्वनागु खँ नं न्ह्यथनातःगु दु ।
अथे हे सार्वजनिक ज्याझ्वलय् सम्माननीय राष्ट्रपतिपाखें अभिव्यक्त जुइगु सार्वजनिक अवधारणाय् थ्व मुद्दाया भावनाया उचित कदर जुइमाःगु माग नं ज्ञापनपत्रय् यानातःगु दु ।
