कारोबार नापं नेप्से नं कुहां वन
येँ (सन्ध्या टाइम्स)/शेयर लगानीकर्तातय् दथुइ ब्लनाच्वंगु निराशाया जः अझं चिला वंगु मदुनि। अथे खःसां छन्हु न्ह्यःया तुलनाय् छुं भचा सन्तुष्ट जुइगु थाय् धाःसा खने दुगु दु। नेप्से थहां कुहां जुइगुली प्रमुख भूमिका दुगु वाणिज्य समुह म्हिगःया कारोबारय् ताः ई लिपा थहां वंसां नेप्सेय् धाःसा छुं लिच्वः लाकेमफुत ।
मेमेगु दिंया कारोबारया तुलनाय् म्हिगः नेप्से सामान्य कुहां वःगु दु। छन्हु न्ह्यः ३ अंकं कुहां वंगु नेप्से म्हिगः शून्य दशमलव १ अंकं कुहां वयाः ६९० दशमलव २२ अंकय् थ्यंगु दु। तर सेन्सेटिभ व फ्लोट धाःसा म्हिगःया कारोबारय् थहां वंगु दु। सेन्सेटिभ शून्य दशमलव १२ अंकं व फ्लोट शून्य दशमलव शून्य ९ अंकं थहां वन ।
वाणिज्य बैंक समुह म्हिगः ताः ई लिपा १ दशमलव ९९ अंकं सामान्य सुधार जुयाः ७१६ दशमलव ५६ अंकय् थ्यंगु दु। अथे हे सुधार जूगु मेगु समुहलय् विमा समुह १ दशमलव ३६ अंकं थहां वनाः ६४७ दशमलव १७ अंकय् थ्यंगु दु।
कुहां वंगु उपसूचकय् विकास बैंक समुह ५ दशमलव ८४ अंकं कुहां वनाः ७२२ दशमलव ६ अंकय् थ्यंगु दु। छन्हु न्ह्यः थहां वंगु जलविद्युत समुह नं १ दशलमव १७ अंकं कुहां वयाः ९४३ दशमलव ९६ अंकय् थ्यंगु दु। अथे हे छन्हु न्ह्यः थहां वंगु विमा समुह नं म्हिगः शून्य दशलमव ५९ अंकं कुहां वयाः ६८० दशमलव १६ अंकय् थ्यन ।
सोमवाः न्यय्गुंगू कम्पनीया शेयर कारोबार जूगु खःसा म्हिगः खुइखुगू कम्पनीया शेयर कारोबार जुल। कारोबार कम्पनीया ल्याः बढे जूसां छन्हु न्ह्यःया कारोबार स्वयां दां व शेयर ल्याःया कारोबार धाःसा कुहां वःगु दु। म्हिगः छगू लाख न्यय्प्यद्वः सछि व न्हय्गू कित्ता शेयर न्याय-मी जुयाः ७ करोड ७० लाख ३४ हजार तका दांया कारोबार जुल।
कारोबार जूगु कम्पनीत मध्येय् म्हिगः नं नेशनल हाइड्रो पावरया दकलय् अप्वः ३६ हजार ५ सय कित्ता शेयर कारोबार जुल। ललितपुर फाइनान्सया शेयरय् प्रति कित्ता ५५/- तका दां थहां वंगु दुसा कास्की फाइनान्सया शेयरय् प्रति कित्ता ५९/- कुहां वल। बैंक अफ एसिया नेपालं दकलय् अप्वः ख्वीगुंगू लाख न्हय्खुद्वः तकां दांया शेयर कारोबार याःगु दु। अप्वः कमे याःगु कम्पनी नेशनल लाइफ इन्स्योरेन्स जूगु दुसा गुमे याःगु कम्पनी लुम्बिनी जनरल इन्स्योरेन्स जूगु दु ।
