बम विष्फोट गणतन्त्र विरोधी ज्या : कोइराला

नेपाली कांग्रेसया सभापति गिरिजाप्रसाद कोइरालां पार्टी ज्याकू सानेपाय् जूगु बम विष्फोटयात गण्तन्त्र विरोधी व संविधान निर्माण ज्या विरुद्धया कायरतापूर्ण ज्याया संज्ञा बियादीगु दु ।

बुधवाः बम विष्फोटन स्थलया निरीक्षण यानादिधुंकाः संक्षिप्त प्रतिक्रिया बियादिसें कोइरालां शान्ति प्रकृयात स्यंकेत स्वइपिं तत्वतय्सं याःगु आक्रमणं कांग्रेस गुंनं हालतं विचलित मजुइगु धयादिल । वयेकलं चीचीधंगु आक्रमणं शान्ति स्थापना, गणतन्त्र संस्थागत व राज्यपुर्नसंरचना थंज्याःगु महत्वपूर्ण खँयात असर मलाकीगु धयादिल ।

पार्टी ज्याकू निरिक्षण यायेत सभापति कोइराला नापं उपाध्यक्ष गोपालमान श्रेष्ठ लगायत कांग्रेस नेतात अन थ्यंकादीगु खः । कांग्रेस पार्टी ज्याकूथीइ मंगलवाः डिफेन्स आर्मी नांया भूमिगत संगठनं बम विष्फोट याकूगु खः ।