सरकार व सशस्त्र पुचत दथुइया वार्ता सकारात्मक
सरकार व तारईलय् सशस्त्र संघर्षरत प्यंगू पुचत दथुइया निगूगु चरणया वार्ता सकारात्मक रुपं क्वचाःगु दु ।
मंगलवाः सिंहदरवारय् च्वंगु शान्ति मन्त्रालयलय् जूगु वार्ताय् पुलांगु न्यागू बुँदे सहमति कार्यान्वयन यायेगु लगायतया सहमति जूगु दु । अथेहे थीथी जेलय् कुनातःपिं सशस्त्र पुचया कार्यकर्तातय्त क्रमस त्वतीगु, सिपिं कार्यकर्तातय्त सहिद घोषणा यायेगु लगायत सहमति जूगु दु ।
निगूलिं पक्षं भदौ २१ गते हानं स्वंगूगु चरणया वार्ता यायेगु सहमति नं प्वंकूगु दु । उगु ईलय् तक निगूलिं पक्षं ल्वाभः मछ्यलीगु सहमति जूगु खँ वार्ता लिपाः जनतान्त्रिक तराई मुक्ति मोर्चा राजन पक्षया नेता राजीव झां जानकारी बियादिल ।
शान्तिमन्त्री रकम चेमजोङ सहितया सरकारी वार्ता पुचलं मधेश मुक्ति टाइगर्स, मधेशी भाइरस किलर्स, तराई संयुक्त जनक्रान्ति पार्टी व जनतान्त्रिक तराई मुक्ति मोर्चा राजन पक्ष नाप वार्ता याःगु खः ।
थ्वस्वयां न्ह्यः माओवादी नेतृत्वया सरकारं न्हापांगु चरणया वार्ता याःगु खसाः निगूगु चरणया वार्ता सोमवाः निसें न्ह्याःगु खः ।
