संघीयता विरोधी धापूया विरोध
येँ (सन्ध्या टाइम्स)/नेपाली कांग्रेसया सभापति गिरिजाप्रसाद कोइरालां जातीय संघ दयेके मजिउ धकाः बिउगु अभिव्यक्तियात कयाः नेवाः देय् गुथि नेपालमण्डलं विरोध याःगु दु ।
गुथिया नायः नरेन्द्रभक्त हाडां थन छगू प्रेस विज्ञप्ति जारी यासें देय् थौं संघीयताय् वनाच्वंगु इलय् जातीय संघ मजिउ धकाः हाकनं छकः आदिवासी जनजातिया अधिकारयात कुण्ठित यायेगु षडयन्त्र जूगु धासें घोर आपत्ति प्वंकूगु दु।
अथे हे 'जनआस्था' वाःपौया सम्पादक किशोर श्रेष्ठलिसे खँल्हाबल्हा यायेगु झ्वलय् संघीयताया बारे राष्ट्रपति डा. रामवरण यादवं प्वंकूगु बिचाःयात कयाः नं गुथिं विरोध प्वंकूगु दु। थौं देय् गणतन्त्र स्थापना जुयाः संघीताया लँपुइ न्ह्यानाच्वंगु इलय् राष्ट्र प्रमुखया थज्याःगु धापू वयेगु अजूचायापुगु विषय खः धासें राष्ट्रपतिया उगु धापूतिं जनजातियात अझ नं अधिकार बञ्चित यायेगु षडयन्त्र खः धकाः प्रेस विज्ञप्तिइ न्ह्यथनातःगु दु। राष्ट्र यादवं 'जनआस्था' वाःपौया सम्पादकयात नापलानाः खँल्हाबल्हा यायेगु झ्वलय् जातीय स्वायत्ततां देय् कुचा दलीगु बिचाः प्वंकादीगु खः ।
