मेम्ह नेपाःमि नं द्यनाच्वँच्वं सित
येँ (सन्ध्या टाइम्स)/ थनिं झिंखुन्हु न्ह्यः जक नेपालं कतार वंम्ह पाल्पाया छम्ह ल्याय्म्ह द्यनाच्वंगु अवस्थाय् सीगु दु।
वंगु शनिवाः कुन्हु कतारस्थित अल जजीरा सिसोर कम्पनीइ क्लिनरया रुपय् ज्या यानाच्वंम्ह धनबहादुर घर्ति मगर द्यनाच्वंगु अवस्थाय् सीगु खः ।
शुक्रवाः चान्हय् थःगु ज्या क्वचायेकाः द्यं वंम्ह मगर न्हिनय् ज्या याइपिं पासापिं थःगु ज्यां लिहां वयेधुंकाः नं द्यनाच्वंगु खनेवं थनेगु झ्वलय् दना मवयेवं जक पासापिंसं मगर सीधुंकूगु खँ सीकूगु खः ।
मगरं ज्या यानाच्वंगु कम्पनीइ हे ज्या याइपिं अप्वः धयाथें न्हूपिं जूगुलिं मदुम्ह मगरया थःथितिया बारे छुं खँ सीमदुनिगु खँ धाःगु दु। मगरया स्वापू तयेगु थाय् मसियाः वया छेँजःपिंत तकं खबर थ्यंके मफयाच्वंगु खँ धाःगु दु। मदुम्ह मगरया छेँय् मां, अबु, कलाःयालिसें निम्ह काय व निम्ह म्ह्याय् दु ।
नेपालं कतार, मलेसिया, साउदी लगायत आपालं देशय् ज्या याःवनीपिं नेपाःमित अप्वः धयाथें द्यनाच्वंगु इलय् सीगु जुयाच्वंगु दुसा सीगु क्रम नं अप्वया वनाच्वंगु खँ अन ज्या यानाच्वंपिं नेपाःमितय्सं धाःगु दु। अथे हे दुर्घटनाय् लानाः नं आपालं नेपाःमि सीगु जुयाच्वंगु दु ।
