संकल्पय् सहलह जुइफु: झलनाथ
येँ (सन्ध्या टाइम्स)/ प्रधानसेनापति प्रकरणय् राष्ट्रपतिं ल्ह्वंगु पलाःया बारे माओवादीं न्ह्यब्वःगु संकल्प प्रस्तावय् सहलह जुइ फइगु खँ एमालेया अध्यक्ष झलनाथ खनालं धयादीगु दु । वय्कलं उगु खँ प्रेस चौतारी बाँकें नेपालगन्जय् याःगु पत्रकार सम्मेलनय् न्ववासें धयादीगु खः ।
स्वंगू दलया सहमति बिना संविधान च्वये मफइगु व शान्ति प्रक्रियायात निष्कर्षय् थ्यंके मफइगु खँ कनादिसें वय्कलं उकिया निंतिं माओवादी सहितया राष्ट्रिय सरकार गठन यायेमाःगु खँ नं बः बियादीगु दु। राष्ट्रिय सरकार गठन यायेगु निंतिं स्वंगुलिं दलया सहमति माः धासें वय्कलं माओवादीयात बिस्कं तयाः न्ह्याः वनेत स्वत धाःसा देय् दुर्घटनाय् लाइगु ख्याच्वः नं बियादिल ।
दलतय् दथुइ असमझदारी अप्वया वन धाःसा जनतां दलतय्त विश्वास यायेगु वातावरण मदइगु अवस्था वयेफुगु ख्याच्वः बियादिसें उकिया निंतिं सकलें दलत छप्पँ जुइमाःगु बिचाः नं वय्कलं प्वंकादिल ।
