कांग्रेस केन्द्रीय ज्याकूथी बम विस्फोट
यातायात व्यवस्था विभागय् नं बम
नेपाली कांग्रेसया केन्द्रीय ज्याकू सानेपाय् मंगलवाः बम विस्फोट जूगु दु । मंगलवाः न्हिनय् जूगु बम विस्फोटय् नाः छुं मानवी क्षति मजूगु खँ प्रहरीं धाःगु दु ।
बम विस्फोटया जिम्मेवारी सुनां मकानिसां घटनास्थलय् नेपाल डिफेन्स आर्मीया पर्चा लूगुलिं घटना डिफेन्स आर्मीं हे याकूगु शंका प्रहरीं याःगु दु । विस्फोट लिपा बैठक कक्षय् मिच्यानाः तःधंगू क्षती जूगु दु ।
घटनास्थलय् थ्यंम्ह छम्ह प्रहरी अधिकारीया कथं साइकलय् विपं मधेशी मूलया छम्ह मनुखं सुतली कांग्रेस ज्याकूया छगू मेचया क्वये तयावंगु खँ धाःगु दु । बम विस्फोटया सूचना लिपाः कांग्रेस कार्यवहाक सभापति सुशील कोइराला, उपसभापति रामचन्द्र पौडेल लगायत कांग्रेस नेतात अन थ्यंकादीगु खः ।
प्रहरीं घटना लिपाः शंकास्पद खुम्हेसित ज्वंगु दुसाः अन ब्यापक सुरक्षाकर्मीत परिचालन याःगु दु । बम विस्फोट लिपा: पर्चा लूगु नेपाल डिफेन्स आर्मीं स्वलाः न्ह्यः यलया एजम्सन चर्चय् विस्फोट याकूगु खः ।
अथेहे मंगलवाः यलया एकान्तकुनाय् च्वंगु यातायात व्यवस्था विभागय् नं छगः शक्तिशाली बम लूगु दु । उगु बलयात सशस्त्र प्रहरीया बम डिस्पोजल पुचःलं निष्कृय याःगु खः । प्रहरीं अन प्रेसरकुकर बम लूगु खँ धाःगु दु । कर्मचारीतय्सं अन शंकास्पद वस्तु लुइवं प्रहरीयात खबर याःगु खः । प्रहरीं अन बम सुनाः तःगु बारे सिमदुनिगु जानकारी ब्यूगु दु ।
