आपराधिक गतिविधि नियन्त्रण यायेत विशेष नीति : अन्सारी

गृह राज्यमन्त्री रिजवान अन्सारीं विशेष सुरक्षा नीति दमन यायेत मखसें दण्डहीनता अन्त्य यायेगु निंतिं लागु यायेत स्वःगु खँ स्पष्ट यानादीगु दु ।

प्रेस चौतारी नेपाल चितवन शाखां मंगलवाः भरतपुरय् याःगु पत्रकार सम्मेलनय् वयेकलं देशय् ल्वाभः ज्वना आपराधिक गतिविधिइ संलग्न जुयाच्विपंनिगु ल्या अप्वयावंगुलिं थुकीयात नियन्त्रण यायेत सरकारं सुरक्षा नीति हःगु धयादिल ।

मन्त्री अन्सारीं लिप्पांगु ईलय् आपराधिक कृयाकलाप म्हो जूगु दाबी यानादिल । येँय् आपराधिक कृयाकलापय् संलग्न डनतय्त प्रशासनया नियन्त्रणय् वयेधुंकगु न्ह्यथंनादिसें वयेकलं तराईलय् दुपिं हतियारधारी आपराधिक पुचःतय्त नं सरकारं मत्वतीगु दाबी यानादिल । मधेश आन्दोलनया नां बिया ल्वाभः ज्वना आतंक ब्वलंकेगु ज्या सरकारं छुं नं हालतं छुट मबीगु खँ नं मन्त्री अन्सारीं धयादिल ।