विद्यार्थी संगठनतय्सं आन्दोलनया ज्याझ्वः स्थगित
ज्वनातपिं थः विद्यार्थी कार्यकर्तातय्त त्वतेगु व प्रवीणता प्रमाणपत्र खारेज यायेगु निर्णय सम्बन्धय् वार्ता पाखें समाधान मालेगु सहमति लिपाः विद्यार्थी संगठनतय्सं आन्दोलनया ज्याझ्वः स्थगित याःगु दु ।
महानगरीय आयुक्तया ज्याकू रानीपोखरीलय् सोमवाः जूगु वार्ताय् स्थानीय प्रशासन, त्रिवि प्रतिनिधि व विद्यार्थीत दथुइ थंज्याःगु सहमति जूगु खः । सहमति लिपाः विद्यार्थीतय्सं निर्वाध रुपं जाँच संचालन यायेबीगु जूगु दु । विद्यार्थीतय् आन्दोलनया कारणं स्वनिगःया थीथी क्याम्पसय् मानविकि व समाजसास्त्र पाखेया स्नाकोत्तर तक न्हापांगु दँया जाँच जुइमफुगु खः ।
अनेरास्ववीयुया अध्यक्ष रामकुमारी झाक्रीं प्रमाणपत्र चीकेगु निर्णय व अवरुद्ध जाँच संचालनया विषयलय् सहमति मालेत मंगलवाः सुथय् च्याताः ईलय् त्रिवि परीक्षा नियन्त्रण ज्याकू बल्खुइ सर्वपक्षीय बैठक च्वनीगु जानकारी बियादिल ।
