संवैधानिक समितिया सभापतिया निर्वाचन भदौ १गते
संवैधानिक समितिया सभापति चयनया निंतिं भदौ १ गते निर्वाचन जुइगु जूगु दु । ताः ई न्ह्यः निसें रिक्त जुयाच्वंगु समितिया सभापति पदया निर्वाचनया निंतिं सभाअध्यक्ष सुवासचन्द्र नेम्वाङ सोमवाः स्वंगू प्रमुख दलत नेकपा (एमाले॒), एकीकृत (माओवादी), नेपाली कांग्रेसया प्रमुख सचेतक व सचेतकत नाप सहलह यानादीगु खः ।
समितिया अध्यक्ष पदया निंतिं प्रमुख प्रतिपक्षी दल माओवादी व नेपाली कांग्रेसं थःथःगु दाबी यानाच्वंगु दु । माओवादीं सभापति पदय् डा. बाबुराम भट्टराईया नां न्ह्यने हःगु दुसाः कांग्रेसं निलाम्बर आर्चायया नां न्ह्येन हःगु दु ।
संविधानसभाया मूल समिति संवैधानिक समितिया सभापति माधवकुमार नेपाल प्रधानमन्त्री जुइवं उगु पद रिक्त जूगु खः । नियमावली कथं रिक्त पद लच्छिया दुने पूर्ति यायेमाःगु खसां दलत दथुइया असमझदारीं यानाः थ्यंमथ्यं स्वलाः जुइधुंकाः नं सभापति चयन यायेमफुगु खः ।
सभापति मदयाः न्हूगु संविधानया प्रस्तावना च्वयेगु लगायत आः तकया ज्या प्रभावित जूगु दु ।
