थ्व आन्दोलन यायेगु ई मखु : प्रम
प्रधानमन्त्री माधवकुमार नेपालं थ्व आन्दोलनया ई मजूगु खँ धयादीगु दु ।
सोमवाः पोखराय् गण्डकी मेडिकल कलेज टिचिङ हस्पिटल एण्ड रिर्सच सेन्टरया उल्लेज्या यानादिसें प्रधानमन्त्री नेपालं थ्व आन्दोलन यायेगु ई मजूगु खँ धयादिल । वयेकलं आ: आन्दोलन यायेगु विषय व कारण नं मदुगु धयादिल । वयेकलं माओवादी आन्दोलन बिना कारण याःगु धयादिसें थुकीया बेमौसमी बाजंया संज्ञा बियादीगु दु । आन्दोलन यायेगु मखसें थ्व शान्ति प्रकृया व न्हूगु संविधान निर्माण ईलय् हे क्वचायेकेगु ई जूगु खँ प्रधानमन्त्री नेपालं धयादिल ।
नेपाली मौलिकता व विशिष्टताय् शान्ति प्रकृया न्ह्याः वनाच्वंगु धयादिसें प्रधानमन्त्री नेपालं माओवादीयात सहलह व सहमतिया राजनीतिक यायेत इनाप यानादिल । वयेकलं माओवादीं शुरु याःगु आन्दोलनं शान्ति प्रकृयायात धरापय् लाकीगु व संघीय लोकतान्त्रिक गणतन्त्र संस्थागत मजुइफुगुलि शंकाः प्वंकादिल ।
प्रधानमन्त्रीं शान्ति प्रकृयायात तार्किक निष्कर्षय् थ्यंकेत ईलय् हे संविधान निर्माण यायेमा:गु खँय् ब: बियादिल । वयेकलं ईलय् हे संविधान जारी यानाः संक्रकमणकालया अन्त्यया निंतिं दक्वं मिलेजुइगुया विकल्प मदुगु धयादिल ।
