जातीय संघयात राष्ट्रपतिया विरोध
येँ (सन्ध्या टाइम्स)/देशय् जातीय स्वशासनया निंतिं सः थ्वयाच्वंगु व छुं राजनीति पार्टीतय्सं जातीय लिधंसाय् हे संघीय व्यवस्था दयेकेगु धकाः तयारी यानाच्वंगु खँयात कयाः राष्ट्रपति डा. रामवरण यादवं असन्तोष प्वंकादीगु दु। सहयोगी वाःपौ 'जनआस्था'या सम्पादक किशोर श्रेष्ठलिसे म्हिगः घौछि नापलायेगु झ्वलय् वय्कलं उगु असन्तोष प्वंकादीगु खः ।
राष्ट्रपतिया धापू उद्घृत यासें सम्पादक श्रेष्ठं 'सन्ध्या टाइम्स'यात कनादिल, 'यदि जातीय लिधंसाय् संघ दयेकेगु ज्या यात धाःसा देश बर्बाद हे जुइ धइगु वय्कःया बिचाः खः।'
अथे हे राष्ट्रपति यादवं माओवादीया नां मकासे छुं राजनीतिक पार्टीत थःपिनि विरोधय् सतक आन्दोलन यायेत न्ह्यचिलाच्वंगु खँ न्ह्यथँसें प्रधानसेनापति प्रकरणय् राष्ट्रपतिं याःगु ज्या सही खः लाकि गलत धइगु विषयय् सर्वोच्चया निर्णय मपिसे जनतायात दुःख जुइ कथं आन्दोलनय् कुहां वंगु गलत जूगु टिप्पणी नं यानादीगु खः। थुकिं यानाः देय्या राष्ट्रियताय् लिच्वः लाकी धकाः नं वय्कलं चिउताः प्वंकादीगु खँ श्रेष्ठं कनादिल।
