नेवाः स्वायत्त राज्यबारे प्रशिक्षण
येँ (सन्ध्या टाइम्स)/नेवाः जागरण मञ्चया भातृ संगठन नेवाः जागरण व्यापारी मञ्चं नेवाः स्वायत्त राज्य सम्बन्धय् छगू प्रशिक्षण ज्याझ्वः यात। क्षत्रपाटी पार्टी प्यालेसय् जूगु उगु प्रशिक्षण ज्याझ्वलय् नेवाः समुदायया सछिं मल्याक स्थानीय व्यापारीतय्सं ब्वति काःगु खः ।
ज्याझ्वलय् जागरण मञ्चया संयोजक सुजीव वज्राचार्यं प्रशिक्षण ज्याझ्वःया महत्वयात कयाः ध्वाथुइकादीगु खः। अथे हे जागरण मञ्चया सचिव विजयकृष्ण श्रेष्ठं नेवाः समुदाययात नेवाः स्वायत्त राज्यया आवश्यकता बारे स्पष्ट यानादिल ।
छघौत्या तक न्ह्याःगु प्रशिक्षणय् नेवाः देय् दबूया संरक्षक मल्ल के. सुन्दरं नेवाः स्वायत्त राज्य छु खः व आः दयेकीगु संविधानय् जातीयताया आधारय् स्वायत्त राज्यया आवश्यकता छाय् दु धइगु बारे प्रशिक्षण बियादीगु खः। वय्कलं नेपाःयात वास्तविक न्हू नेपाः दयेकेत व जनताया सार्वभौमसत्ताया उपयोग याकेत नेवाः भूमिइ नेवाः स्वायत्त राज्य जुइमाःगु बिचाः प्वंकादिल ।
प्रशिक्षण लिपा स्थानीय व्यापारीतय्सं नेवाः स्वायत्त राज्यया विषयय् थःपिंके न्हूगु उर्जा ब्वलंगु बिचाः प्वंकूगु खः।
