परराष्ट्र मन्त्री भारतपाखे
येँ (सन्ध्या टाइम्स)/ प्रधानमन्त्री माधव नेपालं थ्वहे वइगु भदौ २ गतेनिसें ५ गते तक यानादीत्यंगु भारत भ्रमणया झ्वलय् परराष्ट्र मन्त्री सुजाता कोइराला न्यान्हुयंकंया भारत भ्रमण यायेत थौं उखे झाल ।
मन्त्री कोइरालां थःगु भ्रमणया झ्वलय् प्रधानमन्त्रीं याइगु भ्रमणया एजेन्डा बारे सहलह यानादी। लिसें नेपाः व भारतया दथुइ लगानी प्रवर्द्धन सम्बन्धी सम्झौता नं यानादीगु ज्याझ्वः दु ।
अथे हे वय्कलं नेपाः भारत दथुया वाणिज्य सन्धि आवंलि न्हय्दँया निंतिं अद्यावधिक यायेगु सहमति नं यानादी। अथे हे थौंकन्हय् नेपाः व भारत दथुइ सामान आयात-निर्यात यायेबलय् कायम जुयाच्वंगु दोहोरो कर खारेज यायेगु बारे भारतीय समकक्षीयात प्रस्ताव तयादीगु ग्वसाः दु ।
थौंकन्हय् नेपाः व भारतया सिमानाय् भन्सार व क्वारेन्टाइन कार्यालय निगुलिं थासय् भन्सार कायेगु यानाच्वंगु दु।
अथे हे सप्तकोशी व बागमति खुसीया बारे नं वय्कलं खँल्हाबल्हा यानादी ।
मन्त्री कोइरालां थःगु भ्रमणया झ्वलय् भारतीय विदेश मन्त्री एसएम कृष्णा सहित गृहमन्त्री पी. चिदम्बर, कांग्रेस आईया अध्यक्ष सोनिया गान्धी व विपक्षी दलया नेता लालकृष्ण आडवानीलिसे नं सहलह यानादीगु ज्याझ्वः दु। वय्कः २९ गते स्वदेश लिहां झायादी ।
