अध्यक्ष ल्ययेत सहलह
येँ (सन्ध्या टाइम्स)/ संविधान दयेकेगु ज्याय् दकलय् महत्वपूर्ण संवैधानिक समितिया अध्यक्ष जुयाच्वंम्ह भाजु माधव नेपाल प्रधानमन्त्री जुइधुंकाः प्वनाच्वंगु समितिया अध्यक्ष पद ल्ययेगु निंतिं थौं सभाध्यक्ष सुवास नेम्वाङ्गं थीथी राजनीतिक दलया प्रमुख सचेतक व सचेतकलिसे सहलह यानादीत्यंगु दु ।
वय्कलं थौं कांग्रेस, एमाले व माओवादीया लिसें मेगु
राजनीतिक पार्टीतलिसे नं सहलह ब्याकादी । उगु सहलह ज्याझ्वलय् वय्कलं संवैधानिक समितिया न्हूम्ह अध्यक्ष ल्ययेगु निंतिं निर्वाचन यायेगु बारे नं सहलह यानादीगु ज्याझ्वः दु ।
माओवादीं उपाध्यक्ष डा. बाबुराम भट्टराईयात संवैधानिक समितिया अध्यक्ष दयेकेमाः धकाः प्रस्ताव यानातःगु दुसा उखे नेपाली कांग्रेसं पुलांम्ह वामपन्थी नेता निलाम्बर आचार्यया नां सिफारिस यानातःगु दु ।
अध्यक्ष मदयाः वंगु जेठ ३० गते निसें संवैधानिक समितिया बैठक च्वने फयाच्वंगु मदुनि । थ्वहे साउन महिनाया दुने हे अध्यक्ष ल्ययेगु खँय् केन्द्रित जुयाः सहलह ब्याकीगु खँ धाःगु दु ।
