नेप्से ७०० अंकं क्वय्
येँ (सन्ध्या टाइम्स)/लगातार कुहां वयाच्वंगु नेप्से परिसूचक कुहां वयेगु क्रम अझं दिउगु मदुनि। थ्व वाःया शुरुया कारोबारय् नं नेप्से कुहां वःगु दु। वंगु वाः तक नेप्से ७०० अंकय् थ्यना च्वंगु खःसा थ्व वाःया कारोबारं थ्व ल्याखं नं कुहां वःगु दु ।
अथे हे नेपाल स्टक एक्सचेन्जय् म्हिगः जूगु कारोबारय् नेप्से ६ दशमलव ३७ अंकं कुहां वयाः ६९३ दशमलव ६४ अंकय् थ्यंगु दु। सेन्सेटिभं नं १ दशमलव ९ अंकं कुहां वःगु दुसा फ्लोट शून्य दशमलव ५२ अंकं कुहां वःगु दु।
नेप्से परिसूचकया लिसें उपसूचक नं कुहां वयेगु क्रम निरन्तर रुपं जारी हे जुयाच्वंगु दु। म्हिगः वाणिज्य बैंक समूह ८ अंकं कुहां वयेवं ७२० दशमलव २६ अंकय् थ्यंगु दुसा विकास बैंक समूह नं ९ दशमलव ७९ अंकं कुहां वयाः ७३१ दशमलव ३६ अंकय् थ्यंगु दु ।
कुहां मेगु उपसूचकय् जलविद्युत समूह ३ दशमलव ३८ अंकं घटे जुयाः ९४४ दशमलव ८१ अंकय् कुहां वःगु दुसा विमा समूह शून्य दशमलव ५६ अंकं घटे जुयाः ६४५ दशमलव ६८ अंकय् थ्यंगु दु। फाइनान्स समूह नं शून्य दशमलव ४२ अंकं कुहां वयाः ६७७ दशमलव ९९ अंकय् थ्यंगु दु ।
नेप्सेय् म्हिगः ख्वीन्यागू कम्पनीया छगू लाख न्हय्स्वद्वः खुसः व न्यय्खुगू कित्ता शेयर न्याये-मी जुयाः गुंगू करोड चय्छगू लाख झिंगुद्वः तका दां कारोबार जुल। कारोबार कम्पनी मध्येय् लुम्बिनी फाइनान्सया शेयरधनीतय्सं प्रति कित्ता ४६/- लबः कायेत ताःलाःगु दुसा स्टायण्डर्ड चार्टर्ड बैंकया शेयरधनीतय्सं प्रति कित्ता १४०/- तका द्यापं फयेमाःगु दु ।
वंगु छुं ई न्ह्यः निसें दलकय् अप्वः शेयर कारोबार याना वयाच्वंगु नेशनल हाइड्रो पावर कम्पनीया म्हिगः नं ६२ हजार ६४० कित्ता शेयर कारोबार जुल। बुटवल पावर कम्पनीं दकलय् अप्वः छगू करोड झिन्हय्गू लाख व पीद्वः तका दांया कारोबार याःगु दु ।
म्हिगःया कारोबारय् दकलय् अप्वः कमे याःगु कम्पनी लुम्बिनी फाइनान्स कम्पनी जूगु दुसा अप्वः गुमे याःगुली मालिका विकास विकास बैंक लिमिटेड जूगु दु ।
