विद्यार्थीतय् प्रदर्शनया कारणं यातायात अवरुद्ध

थीथी राजनीति दल सम्बन्धित विद्यार्थी संगठनतय् प्रदर्शनया कारणं स्वनिगःया थीथी क्याम्पस न्ह्यनेया यातायात अवरुद्ध जूगु दु ।

प्रविणता प्रमाणपत्र तह चीकेगु त्रिभुवन विश्वविद्यालयया निर्णय विरुद्ध आन्दोलनरत विद्यार्थीतय्सं आन्दोलन जारी यासें सोमवाः सुथंनिसें अस्क्ल, सरस्वती, थापाथली क्याम्पस न्ह्यने प्रदर्शन याःगु खः । अस्कल क्याम्पस न्ह्यने विद्यार्थीतय्सं गृहमन्त्रीया पुतला तकं च्याकूगु दु ।

प्रदर्शनया कारणं चावहिलय् च्वंगु पशुपति क्याम्पसय् मानव शास्त्र व समाज शास्त्रया जाँच स्थगित जूगु दु । अथेहे विद्यार्थीतय्सं शंकरदेव क्याम्पसय् नं जाँच जुइ मब्यू ।

अथेहे थापाथाली क्याम्पस न्ह्यने प्रहरी व विद्यार्थीत दथुइ ल्वापू जुवलय् छम्ह प्रहरी निरीक्षक नापं न्याम्ह विद्यार्थीत घाःपा जूगु दु ।