दुर्घटनाया सामना यायेत सरकारयात हाथ्या
एकीकृत नेकपा (माओवादी) संसदीय दलया उपनेता व पार्टीया उपाध्यक्ष नारायणकाजी श्रेष्ठ प्रकाशं नागरिक सर्वोच्चता व राष्ट्रिय स्वाधिनताया पक्षय् माओवादीया आन्दोलन पाखें जुइफइगु दुर्घटनाया सामना यायेत आः हे सरकार तयार जुइत हाथ्या बियादीगु दु ।
सोमवाः क्रान्तिकारी पत्रकार संघ तमुवान राज्य समितिं पोखराय् याःगु पत्रकार सम्मेलनय् नेता प्रकाशं थ्व स्वक्वःगु ऐतिहासिक जनआन्दोलन प्रारम्भिक विन्दु जुइफुगु संकेत यानादिल । वयेकलं निर्धारित ईलय् संविधान निर्माण, सेना समायोजन व शान्ति प्रकृयायात तार्किक निष्कर्षय् थ्यंकेत दबाव सिर्जना यायेगु ताः तयाः नं थ्व आन्दोलन शुरु जूगु धयादिल ।
प्रतिक्रियावादी, परम्परागत संसदीय व्यवस्था लादे याये स्वइपिं, वैदेशिक हस्तक्षेप, नागरिक सर्वोच्चता विरोधी व सेना समायोजन विरोधीत विरुद्ध थ्व आन्दोलन जारी जुसां सहमति व सहकार्यया लुखाः धासाः च्यायेका हे तयाःगु धयादिल ।
माओवादी आन्दोलन विरुद्ध सरकर सुम्क मच्वनीगु प्रधानमन्त्रीया धापूया विरोध यानादिसें नेता श्रेष्ठं थंज्याःगु गैरजिम्मेवारी अभिव्यक्तिं माओवादीयात घेराबन्दी लाकेगु व देय्यात गृहयुद्धय् यंकेगू कुतः जूगु दाबी यानादिल ।
