परराष्ट्र मन्त्री कोइराला दिल्ली पाखे
परराष्ट्र मन्त्री सुजाता कोइराला न्यान्हून्यंकया औपचारिक भारत भ्रमणया निंतिं सोमवाः सुथय् उखे पाखे प्रस्थान यानादीगु दु ।
परराष्ट्र मन्त्रालयया उच्च अधिकारी सहमित न्हू दिल्ली झायादिम्ह कोइरालां मंगलवाः थः भारतीय समकक्षीयात नापलानादीगु ज्याझ्वः दु । अथेहे वयेकलं भारतीय वाणिज्य व उद्योगमन्त्री, गृहमन्त्री, अर्थमन्त्री नापं भारतीय नेतात नाप खँल्हाबंला यानादीगु ज्याझ्वः दु ।
भारत प्रस्थान याये न्ह्यः परराष्ट्रमन्त्री कोइरालां त्रिभुवन विमानस्थलय् संचारकर्मीत नाप खँल्हाबंला यानादिसें दुईपक्षीय हितया विषयलय् भ्रमण केन्द्रीत जुइगु धयादिल । वयेकलं प्रधानमन्त्री माधवकुरमा नेपालया भारत भ्रमणया तयारीया नापं निगू दे दथुइया आर्थिक व कुटनीतिक सम्बन्धय् विशेष बः बीगू जानकारी बियादिल । अथेहे वयेकलं निगू देया सीमा सुरक्षाया नां औद्योगिक सुरक्षाया निंतिं वातावरण निर्माणया विषयलय् नं खँल्हाबंला जुइगु धयादिल ।
परराष्ट्र मन्त्रालयया भारत शाखाया सहसचिव पद्युम्नविक्रम शाह, मन्त्रालयया सचिव ज्ञानचन्द्र आचार्य, उपसचिव तीर्थ वाग्ले, सल्लाहकार चिराजीवी नेपाल व मन्त्रीया स्वकीय सचिव भरत सापकोटा नापं भारत प्रस्थान यानादिम्ह कोइराला साउन २९ गते नेपाः लिहांझायादीगु ज्याझ्वः दु ।
