थीथी ज्याझ्वः सहित आदिवासी दिवस हन
झिंन्याक्वःगु विश्व आदिवासी दिवस नेपालय् नं थीथी ज्याझ्वः यानाः आइतवाः हंगु दु । नेपाल आदिवासी जनजाति महासघं थुगुसी थ्व न्हियात आन्दोलन कथं हनेगु निर्णयया कथं न्हूगु संविधानय् आत्मनिर्णयया अधिकार सहित जातिय स्वशासनया माग यासें थ्व न्हि हंगु दु ।
स्वनिगः दुनेया झिंप्यंगू थासं झाँकी सहित पिहांवःगु र्याली लिपाः खुल्लञ्माचय् थ्यंका आमसाभय् ह्यूगु खः । नेवाः देय् दबूलिं नं थनया बसन्तपुलिं छगू तःजिगू र्याली पिथंगु खसाः लिपाः थ्व मेमेगू जनजनतितय् र्याली नाप रत्नपार्कय् वनाः मू वंगु खः ।
र्याली लिपाः खुल्लामञ्चय् जूगु साभाय् न्ववापिं व्यक्तातय्सं जनजातितय् पहिचान व अधिकार सुनिश्चित मजूसाः आन्दोलन यायेगु ख्याच्वः ब्यूगु खः । वयेकपिसं न्हूगु संविधानय् अग्राधिकार व आत्मनिर्णयया अधिकार सहित जातिय स्वशासनया ग्यारेण्टी यायेत नं माग याःगु खः ।
सभाय् सभासद्त पृथ्वी सुब्बा गुरुङ, वर्षमान पुन 'अन्नत', इन्द्रबहादुर गुरुङ लगायत सभासदतय्सं थःपिं थीथी दलपाखें प्रतिनिधित्व यासां न्हापा आदिवासी जूगु व न्हूगु संविधानय् आदिवासी अधिकार सुनिश्चित याकेगू प्रतिबद्धता प्वंकादिल । अथेह सभाय् जनजाति महासंघया महसचिव पासाङ शेर्पा, पुलांम्ह महासचिव डा. ओम गुरुङ, नेवाः देय् दबूया नाय् नरेश ताम्राकारपिंसं न्ववानादीगु खः ।
अथेहे आइतवाः आदिवासी दिवसया लसताय् संविधानसभाय् दुथ्यापिं निसलं मल्याक्क जनजनति सभासदतय्सं सिंहदरवारया पश्चिम गेटं र्याली पिथना आदिवासी दिवसय् एक्यबद्धता तकं प्वंकूगु खः ।
आदिवासी दिवसया हे लसताय् स्वनिगलं पिनेया थीथी थासय् नं जुलुस व सभा यानाः आदिवासी दिवस तःजिह हंगु दु ।
विश्वया आदिवासी नेतात दकलय् न्हापां सन् १९८२ अगस्त ९या न्हि कुन्हु संयुक्त राष्ट्र संघय् मुनाः सहलह याःगु न्हियात हे लुमंकाः लिपाः संयुक्त राष्ट्र संघं सन्२००३ निसें निरन्तर रुपं अगस्त ९यात विश्व आदिवासी दिवसया कथं हनावयाच्वंगु ख: ।
