माओवादी पाखें देयन्यंक प्रदर्शन
क्रान्तिकारीया नेतात आमरण अनसनय्
राष्ट्रपतिया असंवैधानिक पलाः व नागरिक सर्वोच्चताया माग यासें आन्दोलन घोषणा याःगु एनेकपा (माओवादीं) आइतवाः देयन्यंकया न्ह्यन्यागू हे जिल्लाय् विरोध प्रदर्शन याःगु दु ।
लच्छि तकया अल्टिमेटम दुने नं सरकारं थःपिनि माग पूमवंकूगु धासें माओवादीं पूर्वघोषित ज्याझ्वः कथं आइतवाः विरोध प्रदर्शन व सभा याःगु ख: । माओवादीं येँ, यल व ख्वपं छक्वलं निन्हय्सिया प्यताः ईलय् विरोध जुलुस प्रदर्शन याःगु खः । येँया रत्नपार्क, यलया लगनख्यः व ख्वपःया सुकुलढोकां विरोध जुलुस पिथंगु खः ।
येँया रत्नपार्कं पिहांव:गु जुलुस सरकार विरोधी नारा थ्वयेकूसें बागबजाः, प्रदर्शनीमार्ग, सहिदगेट, वीर अस्पताल जुया शान्तिवाटिकाय् थ्यंकाः कोणसभाय ह्यूगु खः । कोणसभायात सम्बोधन यानादिसें माओवादी पोलिटब्यूरो दुजः हिसिला यमीं नागरिक सर्वोच्चताया निंतिं माओवादीं स्वक्वःगु जनआन्दोलनया घोषणा याना:गु उदघोष यानादिल ।
अथेहे यलय् पिहांवःगु जुलुस लिपा जूगु कोणसभाय् न्ववानादिसें मेम्ह माओवादी पोलिटब्यूरो दुजः पम्फा भुसालं संविधान व कानुनय् हे मदुगु अधिकार छ्यलाः सेरेमोनियल राष्ट्रपितं जुजुं थें हे शासन यायेत स्वःगुलिं सदन व सतकं नागरिक सर्वोच्चताया रक्षा यायेमाः धयादिल ।
माओवदीं विरोध जुलुस लिपाः रत्ननगर, पोखरा, नुवाकोट व पर्वतय् नं विरोध सभा याःगु खः ।
अथेहे माओवादीया भातृ संगठन अनेरास्ववीयु क्रान्तिकारीया नेतात प्रविणता प्रमाणपत्र तह खारेज यायेगु त्रिभुवन विश्वविद्यालयया निर्णयया विरोध यासें आमरण अनसनय् च्वंगु दु ।
क्रान्तिकारीया अध्यक्ष लेखनाथ न्यौपाने नापं स्वम्ह नेतात कीपूलि च्वंगु उपकुलपतिया ज्याकू न्ह्यने आइतवाः नं निसें आमरण अनसन शुरु याःगु खः । अध्यक्ष न्यौपाने नापं क्रान्तिकारीया कोषाध्यक्ष रमेश मल्ल व सानोठिमी क्याम्पसया स्ववियु सभापति विरेन्द्र बस्नेत आमरण अनसन च्वंगु खः ।
