जातीयताया आधारय् बहुसदस्यीय समानुपातिक प्रत्यक्ष निर्वाचन प्रणाली : माओवादी
एकीकृत नेकपा (माओवादीं) न्हूगु संविधानय् जातीय आधारय् बहुसदस्यीय समानुपातिक प्रत्यक्ष निर्वाचन प्रणाली जुइमाःगु प्रस्ताव न्ह्यने सारे याःगु दु ।
आइतवाः च्वंगु राज्यया शासकीय स्वरुप निर्धारण समितिया बैठकय् माओवादीं जनसंख्याया आधारय् सिट निर्धारण यायेगु व बहुजातीय आधारय् राज्यया सिमांकन यायेगु प्रस्ताव याःगु दु । २०५८ सालया जनगणनायात आधार दयेका बहुसदस्यी प्रणलीलय् वनेत ५० प्रतिशत मिसा अनिवार्य जुइमाःगु नं माओवादीया प्रस्तावय् दु ।
बहुसदस्यीय निर्वाचन प्रणाली अवलम्वन यासाः दक्वः कथंया जाति, क्षेत्र, लिंग व समुदायया प्रतिनिधित्व जुइगु दाबी माओवादीं याःगु दु । जातीय जनसंख्याया अधारय् सिट संख्या विभाजन यानाः निर्धारित कूल सिट संख्याया आधारय् उम्मेदवारया प्रतिष्पर्धा जुइगु प्रणली माओवादीं प्रस्ताव याःगु दु ।
माओवादीं पेश याःगु निर्वाचन प्रणाली प्रति कांग्रेस, एमाले, मधेशी जनअधिकार फोरम लगायत दलतय्सं धासाः असहमति प्वंकूगु दु । कांग्रस, एमाले लगायत दलया सभासदतय्सं जातीया आधारय् सिट संख्या विभाजन यायेगु खतरनाक जूगु तर्क न्ह्यब्वःगु खः । जातीयताया आधारय् न्ह्यावंसाः राजनीतिक बिचारधारा व नेतृत्व गौण जुइफइगु व दक्वं जातियात समावेश यायेमफुसाः लिपाः समस्या वयेफुगु धासें आशंकाः प्वंकूगु खः ।
माओवादी सभासद देव गुरुङं राष्ट्रपतिया नेतृत्वय् सहमतीय सरकारया प्रस्ताव नं न्ह्यब्वःगु दु । राष्ट्रपति प्रत्यक्ष निर्वाचित जुइगु व पार्टीं प्राप्त याःगु मतया आधारय् सरकारय् ब्वति कायेमाःगु प्रस्ताव माओवादीं याःगु दु ।
