गुरुङ कामु प्रधानसेनापित

आइतवाः च्वंगु मन्त्रिपरिषदया बैठकं नेपाली सेनाया बलाधिकृत रथि छत्रमान गुरुङयात कायममुकायम प्रधानसेनापतिलय् नियुक्त याःगु दु । रक्षा मन्त्रालयं सेनापति रुक्मांग कटवालया विदा स्वीकृत यायेवं गुरुङयात कामुया जिम्मेवारी ब्यूगु खः । थ्व निर्णय पाखें वयेकयात भावी सेनापति जुइगु लँपू चाःगु दु ।

मन्त्रिपरिषदं नेपाल औद्योगिक विकास लिमिटेडया महाप्रवन्धकय् शिवजी राय यादव व वीपि कोइराला क्यान्सर अस्पतालया सञ्चालन समितिया अध्यक्षय् केशवनिक त्रसिकोयात नियुक्त याःगु दु ।

अथेहे बैठकं मानव अधिकार सम्बन्धि विश्वव्यापी आवधिक प्रतिवेदन तयार याये निंतिं समिति गठन यायेगु नं निर्णय याःगु दु । नापं सप्तरीया सुरेन्द्रप्रसाद यादव व रौतहटया लक्ष्मण यादवया छेँजःयात राहत बीगू निर्णय नं या:गु दु ।