माओवादी विनाशया लँपू पाखे : खनाल
नेकपा (एमाले)या अध्यक्ष झलनाथ खनालं हिंसात्मक गतिविधि अप्वयेकाः माओवादीं थःगु हे विनाशया लँपू देयेकाः च्वंगु टिप्पणी यानादीगु दु ।
आइतवाः येँय् एमालेय् मेमेगू पार्टी पाखें दुहांविपं नेता व कार्यकर्तातय्त लसकुस यायेगु ज्याझ्वलय् अध्यक्ष खनालं हिंसात्कक लँपू परित्याग मयासाः माओवादीया 'पत्तासाफ' जुइगु दाबी यानादिसें माओवादी थंज्याःगु हे पह नं न्ह्याः वंसाः भविष्यय् पार्टीलय् पुष्पकमल दाहाल व मोहन वैद्य जक ल्यनीगु धयादिल ।
माओवादीं यायेत्यंगु आन्दोलन समस्याया समाधान मजूगु धयादिसें वयेकलं सहमतिलय् वयेत इनाप यानादिल । वर्तमान ईलय् सहमतिया राजनीतिया आवश्यकता जूगु धयादिसें अध्यक्ष खनालं आपराधिक गतिविधि अप्वया यंकूसाः माओवादी नाप सहकार्य मजुइगु ख्याच्वः बियादिल ।
वयेकलं न्हूगु संविधान निर्माण जुया संसदीय निर्वाचन मजूतल्ले राष्ट्रिय एकता, सहकार्य व समझदारी आवश्यक जूगु खँय् बः बियादिल । कम्युनिष्ट पार्टी एकीकरण्या अभियान शुरु जूगु न्ह्यथंनादिसें वयेकलं भविष्यय् छगू हे कम्युनिष्ट पार्टी जुइगु दाबी यानादिल । वयेकलं एकीकृत संयुक्त कम्युनिष्ट पार्टीया नेतृत्व एमालें याइगु नं दाबी यानादिल ।
