गुथि संस्थानया विकल्प न्ह्यब्वल
येँ (सन्ध्या टाइम्स)/ गुथि संस्थानया औचित्य व नेवाः संस्कृति संचालन सम्बन्धी अध्ययन यायेत नेपाल सरकारपाखें स्वंगु उच्चस्तरीय अध्ययन समितिं म्हिगः छगू राष्ट्रिय सांस्कृतिक गोष्ठी यात ।
गोष्ठी इतिहासकार डा. त्रिरत्न मानन्धरं उलेज्या यानाः न्ह्याःगु
खः। गोष्ठीइ पाहांपिंत लसकुसयासें ग्वसाः कजि मोहनकृष्ण डंगोलं थगुने तत्कालिन सरकारं येँयाःया अन्तिम दिंकुन्हु म्येय् मबीगु निर्णयं सवःभकु, पुलुकिसि व लाखेया जक मखु सम्पूर्ण नेवाःतय्गु संस्कृति न्हंकेगु कुतः जूगुलिं दक्व नेवाःत दना वयाः आन्दोलन सफल याःगु खः धयादिल ।
अध्ययन प्रतिवेदनया सार न्ह्यब्वसें अध्ययन कार्यदलया संयोजक डा. चुन्दा बज्राचार्यं नेवाःतय्गु धार्मिक व सांस्कृतिक परम्पराया समस्या समाधान यायेत गुथि संस्थानया विकल्पय् बिस्कं संस्कृति सञ्चालन व संवर्द्धन सम्बन्धी वैकल्पिक निकायया स्वरुप समेत पेश यानादिल ।
प्रतिवेदनयात कयाः मल्ल के. सुन्दर, डा. केशवमान शाक्य, डा. मंगलसिद्धि मानन्धर, तीर्थराम डंगोल, पवनमान श्रेष्ठ, जलकृष्ण श्रेष्ठ आदि नापं संस्कृति, गुथि व भाषा ख्यःलिसे सम्बन्धित मनूतय्सं टिप्पणी यानादीगु खः ।
