थौं स्वनिगलय् माओवादी जुलुस
येँ (सन्ध्या टाइम्स)/राष्ट्रपतिया पलाः भिंकेमाःगु माग यासें आन्दोलनय् कुहां वःगु माओवादीं थौं देय्न्यंकं प्रदर्शन यायेत्यंगु दु ।
थ्वहे झ्वलय् स्वनिगःया स्वंगुलिं जिल्लाय् नं विरोध प्रदर्शन याइगु जूगु दु । थौं ४ बजे येँया रत्नपार्क, यलया लगंख्यः व ख्वपया सुकुलध्वाखां जुलुस पिकाइगु ज्याझ्वः दु ।
अथे हे आन्दोलनया ज्याझ्वः कथं २६ व २७ गते भित्ते लेखन, प्रचार प्रसार, २८ गते सिंहदरवारय् धर्ना बीगु व ३० गते कार्टुन ब्वज्या, भदौ ४ गते देय्न्यंकंया गाविसय् मशाल जुलुस, ७ गते स्वनिगलय् जनसभा व १० गते स्वनिगःव्यापी मशाल जुलुस प्रदर्शनया यायेगु ज्याझ्वः तयातःगु दु ।
थुकिया लिपा नं थःपिनि मागयात संवोधन मयात धाःसा थप आन्दोलनया घोषणा याये फइगु खँ माओवादी स्रोतं धाःगु दु।
उखे त्रिभुवन विश्वविद्यालयं प्रमाणपत्र तह चीकूगु विरोधय् अखिल (क्रान्तिकारी) या महासचिव हिमाल शर्माया नेतृत्वय् थनिंनिसें आमरण अनसन शुरु याःगु दु । प्रमाणपत्र तह चीकेगु त्रिविया निर्णय विरुद्ध थीथी विद्यार्थी संघतय्सं चरणबद्ध आन्दोलन याना वयाच्वंगु दु ।
