सशस्त्र पुचःलिसे थौं वार्ता
येँ(सन्ध्या टाइम्स)/तराई लागाय् सशस्त्र आन्दोलन याना वयाच्वंगु पुचःत लिसे थौं सरकारं वार्ता याइगु जूगु दु। शान्ति तथा पुनर्निर्माण मन्त्रालयय् उगु वार्ता जुइत्यंगु खः । थौंया वार्ताय् न्हापा जूगु वार्ताया मूल्यांकन व समिक्षा जुइगु खँ धाःगु दु ।
वार्ताय् तराई संयुक्त जनतान्त्रिक पार्टी, जनतान्त्रिक मधेशी मुक्ति मोर्चा (राजन मुक्ति पुचः), मधेशी भाइरस किलर्स व मधेशी मुक्ति टाइगर्सया प्रतिनिधितय्सं ब्वति काइगु खँ धाःगु दु। थ्व प्यंगुलिं पुचलं न्हापा नं सरकारलिसे छगू चरण वार्ता यायेधुंकूगु दु ।
थ्व प्यंगुलिं पुचलं सरकारयात याकनं वार्ता यायेमाल धकाः दवाव बिया वयाच्वंगु खः ।
सरकारं विशेष सुरक्षा योजना हयाः तराई लागाय् योजनावद्ध रुपं कारवाही न्ह्याकेवं मधेशय् सशस्त्र आन्दोलन याना वयाच्वंगु पुचःत वार्ताया निंतिं तयार जुयाच्वंगु खँ सीदुगु दु।
अथे हे तराई लागाय् राजनीतिक उद्देश्य ज्वनाः न्ह्यानाच्वंगु पुचःत नं थवं थवय् एकीकृत जुयाच्वंगु खँ सीदुगु दु ।
