नेप्से छवाःया कारोबारय् ५ अंक क्वय्
येँ (सन्ध्या टाइम्स)/ नेपाल स्टक एक्सचेन्जय् थुगु वालय् स्वन्हु जक कारोबार जुल। थ्व स्वन्हुया दुने शेयर बजारय् ८४ गू कम्पनीया कारोबार जुल। थुगु ल्याखं ४०४६ कारोबारं नीखुगू करोड ३३ लाख ८४ हजार दां बराबरया न्यागू लाख झिखुद्वः व प्यसः कित्ता शेयर न्याये-मी जूगु दु। थ्व वाःया कारोबारय् वंगु वालय् जूगु कारोबार स्वयां ४४ दशमलव २९ प्रतिशतं कुहां वःगु दु ।
वंगु वालय् ५७१६ गू शेयर कारोबारं पीन्हय्गू करोड नीच्यागू लाख निद्वः दांया न्हय्गू लाख झिंछद्वः खुसः कित्ता शेयर न्याये-मी जूगु खः।
नेपाल स्टक एक्सचेञ्ज थ्व वाःया शेयर कारोबारय् नेप्से परिसूचक वाःया न्हापांगु न्हिया तुलनाय् ४ दशमलव ७० अंकं कुहां वयाः ७०० दशमलव शून्य १ अंकय् थ्यंकाः बजाः बन्द जूगु खः ।
अथे हे थ्व वालय् 'क' वर्गय् लाःगु कम्पनीया जक झिंनिगू करोड स्वीछगू लाख दांया कारोबार जुल। थ्व कारोबार नेप्सेय् थ्व वालय् जूगु कूल कारोबारया ४६ दशमलव ७५ प्रतशत खः। सेन्सेटिभ इन्डेक्स नं थ्व वाःया कारोबारय् न्हापांगु न्हिया तुलनाय् २ दशमलव ६८ अंकं कुहां वःगु दु।
नेप्सेय् थ्व वालय् निगू करोड झिंप्यंगू लाख दां कारोबार याःगु ल्याखं सिटिजन्स बैंक इन्टरनेशनल, छगू लाख न्हय्स्वद्वः कित्ता शेयर न्याये-मी जूगु ल्याखं नेशनल हाइड्रो पावर व दकलय् अप्वः प्यसः व ख्वीगू संख्या कारोबार याःगु ल्याखं बैंक अफ एशिया नेपाल दशलकय् न्ह्यःने लाःगु दु।
एस डेभलपमेण्ट बैंकया हकप्रद शेयर थ्व वालय् नेपाल स्टक एक्सचेन्जय् सूचीकृत जूगु दु ।
