स्वम्ह स्ववीयु सभापति नापं खुम्हेसित ज्वन
त्रिचन्द्रय् नेविसंघ व अनेरास्ववीयु दथुइ ल्वापू
एमबीएस न्हापांगु दँया साउन १२ गते जूगु जाँच हानं यायेमाःगु माग यासें त्रिभुवन विश्वविद्यालयलय् धर्ना ब्यूवंपिं विद्यार्थी व प्रहरी दथुइ ल्वापू जूगु दु । ल्वापू लिपा प्रहरीं स्वम्ह स्ववीयु सभापति सहित खुम्हेसित ज्वना यंकूगु दु ।
प्रहरीं पाटन क्याम्पसया स्ववीयु सभापति झपेन्द्र खत्री, शिक्षा क्याम्पस ताहाचलया अनुप चापागाईं व शंकरदेव क्याम्पसया शुभराम बस्नेतयात ज्वना यंकूगु खः । अथेहे स्ववीयु सभापतित नापं पुष्प रिजाल, दीपेन्द्रकुमार सिंह व अन्जना अर्यालयात नं प्रहरीं ज्वना यंकूगु दु ।
विद्यार्थी व प्रहरीत दथुइ अप्पां क्येकाः नं ल्वापू जूगु खसाः लिपाः प्रहरीं स्थिति नियन्त्रणय् कायेत अश्रुग्यास क्येकूगु खः ।
अथेहे त्रिचन्द्र क्याम्पसय् ठक्का विवादया कारणं ख्वाँउसे च्वंगु नेपाल विद्यार्थी संगठन व अनेरास्ववीयु दथुइया स्वापू मज्यनीवलय् आइतवाः हानं ल्वापू जूगु दु । नेपाली कांग्रेस निकट नेविसंघ व नेकपा (एमाले) निकट अनेरास्ववीयु दथुइ त्रिचन्द्र क्यम्पस पिने खुकुरीं क्येकाः ल्वापू जूगु खः । ल्वापूइ लानाः प्यम्ह अनेरास्ववीयुया कार्यकर्तात घाःपा जूगु दु । घाःपा जूपिंतं मोडेल अस्पतालय् वासः याकातःगु दु ।
अनेरास्ववीयुं थः कार्यकर्तातय्त नेविसंघया कार्यकर्तातय्सं आक्रमण याःगु द्वपं ब्यूगु दु ।
