माओवादीया अभिव्यक्ति आपत्तिजनक : मन्त्री रिजाल
संविधान सभा, संघीय मामिला, संसदीय व्यवस्था व संस्कृति मन्त्री डा. मिनेन्द्र रिजालं एकीकृत नेकपा (माओवादीं) वर्तमान सरकार व प्रधानमन्त्री माधवकुमार नेपाल सम्बन्धी प्वंकूगु अभिव्यक्ति आपत्तिजनक जूगु खँ धयादीगु दु ।
आइतवाः भैरहवाय् कांग्रेस रुपन्देही शाखां याःगु छगू ज्याझ्वःलय् न्ववानादिसें मन्त्री रिजालं संवैधानिक सभापति दयकेत सिनाजुपिं माओवादीत आः प्रधानमन्त्री जुयादिम्ह नेपाल व संविधान सभाया बहुमतं सभासद्तय् समर्थन दुगु सरकारया बारे टिप्पणी यायेगुया छुं टुक मदुगु धयादिल ।
वयेकलं नागरिक सर्वोच्चतया विषयलय् न्ह्याक्वः धुर्की क्यंसां अन्तत माओवादी सरकारय् समावेश जुइगु दाबी यानादिल । थःगु स्वार्थया निंतिं नागरिक सर्वोच्चतया खँ ल्ह्या मज्यूगु धयादिसें मन्त्री रिजालं हिंसा, सर्वसत्तावाद व अधोगमन त्वताः शान्ति, लोकतन्त्र व सहकार्यया लँय् वयेत माओवादीयात इनाप यानादिल ।
थंज्याःगु हे राजनीतिक परिस्थिति जुयाच्वंसाः संविधान ईलय् हे निर्माण यायेत थाकुइगुलिं दक्वं राजनीतिक दलत मिलेजुइ माःगु व उकीया निंतिं माओवादी नं तयार जुइमाःगु बिचाः मन्त्री रिजालं प्वंकादिल ।
