विशेष सुरक्षा व्यवस्था सरकारी आतकं : यादव
मधेशी जनअधिकार फोरमया अध्यक्षा उपेन्द्र यादवं विशेष सुरक्षा व्यवस्थाया नांमय् सरकारं आतकं ब्वलंकूगु द्वपं बियादीगु दु ।
मधेशी पत्रकार समाजपाखें आइतवाः नेपालगञ्जय् ग्वसाः ग्वःगु पत्रकार नापलायेगु ज्याझ्वःलय् अध्यक्ष यादवं शान्ति सुरक्षा कायम यायेगु निंतिं सरकारं थःपिं नाप छुं नं सहमति मयाःगु धयादिसें वर्तमान सरकारं शक्तिया दुरुपयोग याःगु नं द्वपं बियादिल ।
तराई क्षेत्रय् दमन यानाः सरकारं मधेशीतय्त आतंकित याःगु धयादिसें यादवं मधेशी मुद्दाय् सुं नाप नं सम्झौता मयायेगु स्पष्ट यानादिल । वयेकलं शान्ति प्रकृया व मधेशीया मुद्दाय् सरकार सुम्क च्वंसाः स्वक्वःगू जनआन्दोलन यायेगु ख्याच्वः तकं बियादिल ।
अथेहे मेगू छगू प्रशंगय् अध्यक्ष यादवं उपराष्ट्रपतिया शपथ प्रकरणया विषयय् आदलतया निर्णय मधेश प्रति पूर्वग्रही भावना तयाः याःगु निर्णय जूगु टिप्पणी यानादिसें उगु निर्णय प्रति आपत्ति प्वंकादिल ।
