राष्ट्रपति विरुद्ध महाभियोग ह्येत माओवादीयात हाथ्या
सरकारया प्रवक्ता व सुचना व संचारमन्त्री शंकर पोखरेलं राष्ट्रपति डा. रामवरण यादव विरुद्ध महाभियोग प्रस्ताव ह्येत एनेकपा (माओवादी)यात हाथ्या बियादीगु दु ।
शनिवाः येँय् ग्वसाः ग्वःगु छगू साक्षात्कार ज्याझ्वःलय् न्ववानादिसें मन्त्री पोखरेलं माओवादीयात राष्ट्रपतिया पलाः बारे संसदय् सहलह यायेमाथें च्वंसाः महाभियोग ह्येत हाथ्या बियादिल । वयेकलं धयादिल, - 'राष्ट्रपतिया पलाखं द्वंकूगु थें च्वंसाः माओवादी महाभियोग हयाः क्यं ।' वयेकलं सदन अवरुद्ध यानाः विकास व संविधान निर्माणयात अवरोध यायेगुया छुं अर्थ मदु धयादिल ।
राष्ट्रपतिया पलाःया बारे माओवादी अध्यक्ष पुष्पकमल दाहाल 'प्रचण्डं' संसदय् न्ह्यसः तयाःदीगु व प्रधानमन्त्री माधवकुमार नेपालं लिसः बीधुंकूगु धयदिसें सरकारी प्रवक्त पोखरेलं हानं संसदय् थुकीया बारे सहलह यायेगुया छुं अथं मदु धयादिल ।
ज्याझ्वलय् मन्त्री पोखरेलं जनआन्दोलन छुं नं छगू दलं धायेवं मजुइगु धयादिसें सरकार क्वथलीगु बिचाः माओवादीं मयासाः बांलाइगु टिप्पणी यानादिल । माओवादीया मागयात नीनिगू दलं अस्वीकार याःगुलिं गठबनधन अझ बल्लाःगु धयादिसें मन्त्री पोखरेलं माओवादीं गुलि अप्व सरकारया विरुद्ध ज्या याइ उलि हे सरकार बल्लाइगु दाबी यानादिल ।
