माओवादी अध्यक्ष बेलायत प्रस्थान
प्रधानमन्त्री नापया खँल्हाबंला निष्कर्षविहीन
माओवादी अध्यक्ष पुष्पकमल दाहाल 'प्रचण्ड' छवाः ताःहाकःगु भ्रमणया निंतिं शनिवाः बेलायत प्रस्थान यानादीगु दु । युरोपय् दुपिं माओवादी कार्यकर्तातय्त प्रशिक्षण बीत शनिवाः कलाः सीता व काय् प्रकाश नाप बेलायत झायादीगु खः ।
बेलायत प्रस्थान याये न्ह्यः माओवादी अध्यक्ष प्रचण्डं राजनीतिक गतिरोध अन्त्यया निंतिं प्रधानमन्त्री माधवकुमार नेपालनाप यानादीगु सहलह निष्कर्ष विहीन जूगु दु । प्रधानमन्त्रीया कोटेश्वरय् च्वंगु छेँय् जूगु सहलहलय् निम्हं थःथःगु अडानय् अडिग जुइवं सहलह पाखें छुं निष्कर्ष पिहांवये मफुगु खः ।
प्रधानमन्त्री नेपालं राष्ट्रपति विरुद्धया संकल्प प्रस्तावय् सदनय् सहलह जुइमफइगु अडान कायादिल । वयेकलं विकल्पया रुपय् कार्यदल गठन यानाः निकास मालेफइगु धयादिल । माओवादी अध्यक्ष प्रचण्डं धासाः माओवादीया पुलांगु हे माग तयादीगु खः । वयेकलं राष्ट्रपतिया पलाःया बारे संसदय् सहलह याकेत प्रधानमन्त्री नेपाल नाप माग यानादीगु खः ।
बेलायत प्रस्थान याये न्ह्यः त्रिभुवन अन्तर्राष्ट्रिय विमानस्थलय् पत्रकार सम्मेलन यानाः प्रधानमन्त्री नापया खँल्हाबंलया बारे जानकारी यानादीगु खः । वयेकलं नागरिक सर्वोच्चताय कायम मजूतल्ले सत्तारुढ दलनाप सहकार्य यानाः न्ह्याः वनेमफइगु धयादिल ।
