माओवादी सहमतिपाखें बिस्यूंवन : पोखरेल
नेकपा (एमाले)या महासचिव ईश्वर पोखरेलं माओवादी सहमतिया राजनीति पाखें बिस्यूवंगु द्वपं बियादीगु दु ।
शनिवाः धनकुटाय् प्रेस चौतरीं ग्वसाः ग्वःगु पत्रकार नापलायेगु ज्याझ्वःलय् न्ववानादिसें सरकारं सहमतिया यात्रायात निरन्तारता बीगु धासां माओवादीं सहमति व सहकार्यया विवरीत ज्या याःगु धयादिल ।
माओवादीया ज्या संविधान निर्माणयात प्रभावित याइगु कथं जूगु खँ महसचिव पोखरेलं धयादिल । वयेकलं माओवादीयात राष्ट्र व जनताया हित विपरीत गतिविधि त्वताः तत्काल सहमतिया राजनीतिइ लिहांवयेत इनाप यानादिल । वयेकलं शान्तिपूर्ण ढंगं आन्दोलन यायेदइगु तर अराजकता व हिंसाजन्य ज्या यासाः सरकर स्वया मच्वनीगु धयादिसें उकीया सरकारं कडा प्रतिकार याइगु धयादिल ।
संविधान निर्माण ज्या ईलय् हे सिधइगु ठोकुवा यानादिसें महासचिव पोखरेलं परिवर्तन चाहे जुपिं राजनीतिक दलतय् वृहत लोकतान्तिक मोर्चा गठन यानाः न्ह्याः वनेगुया विकल्प मदुगु धयादिल ।
