माओवादी पाखें संसदय् अवरोध
नागरिक सर्वोच्चताया स्थापना व प्रधानसेनापति प्रकरणय् राष्ट्रपतिया पलाःया विषयलय् व्यवस्थापिका संसदय् सहलहया माग यानावयाच्वंगु प्रमुख प्रतिपक्षी दल एकीकृत नेकपा (माओवादीं) थःगु पूर्व घोषित विरोधया ज्याझ्वं कथं शुक्रवाःया व्यवस्थापिका संसदया बैठक अवरोध याःगु दु ।
नागरिक सर्वोच्चता स्थापना यायेगु विषयलय् लच्छि न्ह्यः याःगु सहमति कार्यान्वयन यायेत सरकार गम्भीर मजूगु द्वपं ब्यूसें माओवदीं संसदया बैठक बहिष्कार याःगु खः ।
बैठकया सुरुइ हे ई कयाः न्ववानादिसें माओवादी संसदीय दलया उपनेता नारायणकाजी श्रेष्ठ 'प्रकाशं' सरकारं थःपिं नाप याःगु सहमति कार्यान्वयन यायेत च्यूताः मप्वंकूगु धायादिसें संसद चलेजुइ मबीगु धयादिल ।
वयेकलं नागरिक सर्वोच्चतया विषयल् सहलह यायेमबीगु संसद चलेजुइगुया छुं अर्थ मदु धयादिसें सहलहया वातावरण तयार मजुतल्ले अवरोध कायम हे जुइगु धयादिल । नेता श्रेष्ठया सम्बोधन लिपाः माओवादी सभासदतय्सं नाराबाजी यासें रोष्ट्रम घेरे यानाः संसदय् अवरोध थंगु खः ।
वंगु असार २२ गते सरकारं थःपिनिगु माग लच्छिया दुने पूवंकेगु प्रतिबद्धता प्वंकूसां सरकार थुकी पाखे इमान्दार मजूगुलिं थःपिंसं आन्दोलन यायेमाः खँ नेता श्रेष्ठ धयादिल ।
माओवादीया अवरोध लिपाः व्यवस्थापिका संसदया बैठक सोमवाः तकया निंतिं स्थगित जूगु दु ।
