तमलोपाया सह-महामन्त्री माओवादीइ प्रवेश
तराई-मधेश लोकतान्त्रिक पार्टीया सह-महामन्त्री रामकुमार शर्मा शुक्रवाः एकीकृत नेकपा (माओवादी) पार्टीइ प्रवेश यानादीगु दु ।
शुक्रवाः माओवादी ज्याकू पेरीस डाँडाय् अध्यक्ष पुष्पकमल दाहाल 'प्रचण्डं' वयेकयात लसकुस यानादीगु खः । उगु ज्याझ्वलय् अध्यक्ष प्रचण्डं माओवादी पार्टीलय् प्रवेश याइगु श्रृंखला चलेजूगु व उकी मध्ये शर्माया प्रवेशया बिस्कं हे महत्व दुःगु धयादिल ।
मधेश, नेपाः व दक्षिण एसीयाया निंतिं हे थ्व छगू न्हूगु सन्देश जूगु धयादिसें अध्यक्ष प्रचण्डं मधेशय् माओवादीप्रति क्षणिक मखूगु भ्रम बीगू कुतः जुसां मधेशी जनताया निंतिं धाथें ल्वाइगु पार्टी माओवादी हे जूगु दाबी यानादिल ।
माओवादीलय् प्रवेश यानादिम्ह शर्मां तमलोपा क्रान्तिकारी पार्टी जुइमफुगु व जमिन्दार, पुँजीपती व सामन्तया घेराबन्दीलय् लागुलिं थम्हं उगु पार्टी परित्याग यानाःगु धयादिल ।
भूमिगतकालय् न्यादँ तक माओवादीया भातृसंगठन मधेशी मुक्ति मोर्चाया सलाही-महोत्तरी ईन्चार्ज जुयादिम्ह शर्मा लिपाः माओवादी त्वताः उपेन्द्र यादव नेतृत्वया मधेशी जनअधिकार फोरमय् प्रवेश यानादीगु खः । मेधश आन्दोलनय् फोरम महासचिवया जुयादिम्ह शर्मा फोरम टुक्रा जुइवं भाथ्यनाथ गुप्ताया पार्टीइ प्रवेश यानाः उपाध्यक्ष तकं जुयादीधुंकूगु खः ।
लिपाः तमलोपा गठन जुइधुंकाः वयेक थुगु पार्टीइ प्रवेश यानादीगु खः । संविधानसभाय् नं तमलोपापाखें महोत्तरी-४ पाखें वयेकलं चुनाव त्याकादीगु खः ।
