दुःख बीत आन्दोलन मखु : प्रचण्ड
येँ (सन्ध्या टाइम्स)/प्रधानसेनापति प्रकरणय् राष्ट्रपति डा. रामवरण यादवं ल्ह्वंगु पलाःया विरुद्ध सदनय् संकल्प प्रस्तावय् सहलह याके मबिल धाःसा स्वंगूगु जनआन्दोलन मार्फत जनविद्रोह यायेगु ख्याच्वः माओवादी अध्यक्ष पुष्पकमल दाहाल 'प्रचण्डं' बियादीगु दु। थौं सुथय् पोखराय् पत्रकार सम्मेलनय् न्ववायेगु झ्वलय् वय्कलं उगु ख्याच्वः बियादीगु खः ।
नागरिक सर्वोच्चताया निंतिं थःपिंसं खँ तया वयाच्वनागु खःसां सरकारय् सम्मिलित पार्टीतय्सं चिउताः मक्यंगुलिं थनिंनिसें सदन व सतक आन्दोलनया घोषणा याःगु खः। आन्दोलनया ज्याझ्वः कथं थौं च्वनीगु सदन अवरुद्ध याइगु जूगु दु ।
पत्रकार सम्मेलनय् अध्यक्ष प्रचण्डं सेनापति प्रकरणय् राष्ट्रपतिं ल्ह्वंगु पलाः विरुद्ध थःपिंसं बियागु ई दुने सदनय् सहलह याके मबिउगुलिं आन्दोलनया घोषणा यानागु खँ नं कनादीगु दु। वय्कलं आन्दोलन जनतायात दुःख बीगु कथंया मजुसे शान्तिपूर्ण जुइगु खँ नं कनादिल ।
वय्कलं आन्दोलन न्ह्यायेधुंकूगु जूसां थःपिं अझ नं सहमतिया राजनीतिइ हे दुगु खँ कँसें सत्ताधारी राजनीतिक पार्टीतय्सं सहमति व सहकार्यया राजनीति मयाःगुलिं थःपिंसं नागरिक सर्वोच्चताया निंतिं आन्दोलन यायेमाःगु खँ कनादिल ।
वय्कलं नागरिक सर्वोच्चता कायम मजूतले देशय् न्हूगु संविधान नं दयेके मफइगु ख्याच्वः नं बियादिल। वय्कलं माओवादीया बारे मेगु राजनीतिक पार्टीतपाखें गलत रुपं प्रचार यानाच्वंगु खँ धासें थः माओवादी लडाकुया सुप्रिम कमाण्डर मखुगु खँ नं स्पष्ट यानादिल ।
'क्यान्टोनमेन्टय् च्वनाच्वंपिं लडाकुया भरणपोषण सरकारं यानाच्वंगु अवस्थाय् जितः सुप्रिम कमाण्डर धासें युद्धय् लित छ्वयेगु रणनीतिइ दलत वनाच्वंगु दु ।'
अथे हे उपाध्यक्ष डा. बाबुराम भट्टराईनं प्रधानमन्त्री माधव नेपालं नागरिक सर्वोच्चताया पक्षय् दनेगु हिम्मत यात धाःसा वय्कःयात प्रधानमन्त्री स्वीकार याये फइगु खँ कनादिल ।
