बेसाःभाः थहां वनीगु आशंका
येँ (सन्ध्या टाइम्स)/ थुगु दँय् म्हो जक वा वःगुलिं जाकि, केँ व नसा ज्वलंया भाः थहां वनेफु ।
थुगुसी म्हो जक वा वयाः छ्व नापं चिकुलाय् उत्पादन जुइगु बालि ८० प्रतिशत म्हो जूगुलिं नसा ज्वलंया भाः थहां वंगु खःसा वर्षाय् नं इलय् वा मवःगुलिं जनतायात थप मार लाइगु खँ नं विज्ञतय्सं धाःगु दु ।
थुगु दँय् सरकारं ४५ लाख टन वा उत्पादन यायेगु लक्ष्य तयातःगु खःसां वा मवःगुलिं उगु लक्ष्य पूवंके मफइगु जूगु दु। कृषि तथा सहकारी मन्त्रालयया प्रवक्ता हरि दाहालया कथं माक्व लः मवःगुलिं उत्पादन म्हो जूगु दु। उत्पादन म्हो जुइवं मुल्यवृद्धिइ थप चाप लाइ ।
साउनया स्वंगूगु वाः तक पहाडया ८० प्रतिशत क्षेत्रय् वा पीगु ज्या जूगु दुसा नेपाःया अन्न भण्डार धाइगु तराई लागाय् धाःसा ४० प्रतिशत बुँइ वा पी मफुनि ।
दाहालया कथं छुं ई दुने बांलाक वा वल धाःसा तराई लागाय् लक्ष्य कथं वा सइगु अनुमान दु ।
