माओवादीयात सरकारय् ब्वति कायेत उपप्रमया इनाप
उपप्रधानमन्त्री विजयकुमार गच्छदारं एकीकृत नेकपा (माओवादी)यात सरकारय् ब्वति कायेगु इनाप यानादीगु दु ।
मधेशी जनअधिकार फोरम (लोकतान्त्रिक) गठन लिपाः न्हापांगु पटक विराटनगरय् पत्रकार सम्मेलन यानाः मन्त्री गच्छदारं सर्वदलीय समिकरणय् वयेकत माओवादीयात इनाप यानादिल । वयेकलं सर्वदलीय समिकरण दुने च्वनाः राष्ट्रिय सकमति निर्माण यायेफइ धयादिल ।
सरकारं संचालन यायेगु जिम्मेवारी चूलाकूसां सत्ता संचालन यायेत माओवादी असफल जूगु धयादिसें मन्त्री गच्छदारं थःपिंसं द्वंकूगु स्वीकार यानाः राष्ट्रिय मुद्दाय् छँप्प जुयाः न्ह्यावनेमाःगु खँ बः बियादिल । राष्ट्रिय मुद्दाय् माओवादीं रचनात्मक प्रतिपक्षया भूमिका निर्वाह यायेमाः धयादिसें मन्त्री गच्छदारं नागरिक सर्वोच्चताया निंतिं थः यथ्थे व्याख्या यायेमज्यू धयादिल ।
फोरम लोकतान्त्रिकया अध्यक्ष नं जुयादिम्ह गच्छदारं पत्रकार सम्मेलनय् उपराष्ट्रपतिया सपथ सम्बन्धी सर्वोच्च अदालतया फैसलां मधेशया भावनाय् घाः लाकूगु धयादिल । वयेकलं भाषाया विषयलय् संविधान व कानुन संशोधन यानाः मातृभाषाय् सपथ कायेगु व्यवस्था यायेमाःगु खँय् बः बियादिल ।
छुं दिं न्ह्यः जक उपप्रधानमन्त्री गच्छदारं उपराष्ट्रपतिं अदालतया फैसलाया सम्मान यासें नेपाली भासं हानं सपथ कायेमाः धयादीगु खः ।
