'नागरिक सर्वोच्चता कायम मजुतल्ले देशय् संविधान निर्माण जुइमफइगु'
प्रमुख प्रतिपक्षी दल एकीकृत नेकपा (माओवादीं) नागरिक सर्वोच्चता कायम मजुतल्ले देशय् संविधान निर्माण जुइमफइगु दाबी याःगु दु ।
माओवादीया तमुवान राज्य समितिं शुक्रवाः पोखराय् ग्वसाःग्वःगु पत्रकार सम्मेलनय् माओवादी अध्यक्ष पुष्पकमल दाहाल 'प्रचण्डं' नागरिक सर्वोच्चता कायम मजूतल्ले संविधान निर्माण जुइ मफइगु धयादिसें सत्ताधारी दलत सहमति व सहमार्यया राजनीति पाखे न्ह्यामवंगुलिं माओवादीं नागरिक सर्वोच्चताया निंतिं आन्दोलन यायेमाःगु धयादिल ।
वयेकलं माओवादी ल्ह्वंगु नागरिक सर्वोच्चतया माग बारे संसद छक्वः नं सहलह याये मब्यूगु धयादिसें नागरिक सर्वोच्चताया पक्षय् वकालत यासें माओवादीं सतक व सदनय् आन्दोलन सुरु याना:गु धयादिल । वयेकलं आन्दोलन जनतायात दुःख बी कथंया मजुइगु नं स्पष्ट यानादिल ।
माओवादी हेडक्वाटर हे तमुवान व मगरात राज्य समितिया दुजःतय्त प्रशिक्षण बीत बिहीवाः पोखरा थ्यंगू खः । प्रशिक्षण लिपा शुक्रवाः पत्रकार सम्मेलनय् माओवादी वरिष्ठ उपाध्यक्ष मोहन वैद्य 'किरणं' एमाले बहुपदीय प्रणालिलय् वंगुलिं माओवादी नं बहुपदीय प्रणालीइ मवंगु धयादिसें पार्टीया आवश्यकत कथं थ्व प्रणाली नालाः कयाःगु धयादिल ।
अथेहे उपाध्यक्ष डा. बाबुराम भट्टराईं प्रधानमन्त्रीं नागरिक सर्वोच्चताया पक्षय् दनीगु हिम्मत यासाः माओवादीं माधव कुमार नेपालयात प्रधानमन्त्री कथं स्वीकार यायेगु धयादिल ।
नागरिक सर्वोच्चताया माग पूवंकेत सरकारयात ब्यूगु लच्छिया अल्टिमेटम सिधेवं माओवादी शुक्रवाः निसें ओन्दोलन शुरु याःगु दु ।
