विश्व बैंकया कासाय् नेपाःया प्यंगू प्रस्ताव विजयी
येँ (सन्ध्या टाइम्स)/विश्व बैंकं दक्षिण एशियालीस्तरीय विकास बजारय् क्वय्या तहलय् कुपोषणया समस्यायात सम्बोधन यायेगु विषयस ग्वसाः ग्वःगु कासाय् नेपाःया प्यम्ह कासामि त्याःगु दु ।
नेपालय् पोषण सम्बन्धि ज्याझ्वःत संचालन यायेगु ल्याखं विश्व बैंकपाखें वइगु ४० लाख अमेरिकी डलरया सिरपाः दुगु उगु कासाय् नेपाःया इक्वायल इक्सेस नेपाल, म्याक्सो प्रा. लि. विजय डेभलपमेण्ट रिसोर्स सेन्टर व हेलन कलर इन्टरनेशनल विजयी जूगु खः ।
उगु कासाय् ब्वति कायेगु निंतिं दक्षिण एशियाया दक्वं देशं यानाः द्वःछि मल्याक प्रस्ताव दुहां वःगु खःसा ख्वीगु प्रस्तावयात जक लिपांगु चरणया निंतिं छनौट याःगु खः। बङ्गलादेशया राजधानी ढाकाय् जूगु लिपांगु चरणया प्रदर्शन लिपा नीछगू प्रस्तावयात विजेता घोषणा याःगु खः ।
उगु कासाय् दकलय् अप्वः भारतया गुंगू, नेपाः व बङ्गलादेशया प्यंगू प्यंगू, पाकिस्तानया निगू व श्रीलंका व अफगानिस्तानया छगू छगू प्रस्ताव विजयी जूगु खः ।
