माओवादी आन्दोलन अनुचित : नीनिगू दल
प्रतिरोधया निंतिं तयार जुयाच्वं : प्रचण्ड
सहमति पालना मजूगु धासें आन्दोलन न्ह्याकेत्यंगु एकीकृत नेकपा (माओवादी)या आन्दोलन अनुचित व असान्दर्भिक जूगु निष्कर्ष सत्तारुढ नीनिगू दलं पिकाःगु दु ।
बिहीवाः सनिलय् प्रधानमन्त्री निवास बालुवाटारय् च्वंगु नीनिगू दलयाया बैठकं माओवादीयात आन्दोलनया ज्याझ्वः स्थगित यानाः संवाद मार्फत सहमति मालेत इनाप नं याःगु दु ।
बैठक लिपाः राष्ट्रिय जनशक्ति पार्टीया अध्यक्ष सुर्यबहादुर थापां सहमतिया निंतिं कुतः जारी यासें माओवादीया आन्दोलनया प्रवृति स्वयाः सरकारं नं शान्ति सुरक्षाया ठोस पलाः ल्ह्वनेमाःगु सुझाव दलतय्सं सरकारयात ब्यूगु धयादिल ।
अथेहे प्रधानमन्त्रीया सल्लाहाकार रघुजी पन्तं सरकार आन्दोलन मजुइमाः धइगु पक्षय् दुगु व उकीयात निंतिं माक्वः कुतः यानाःगु धयादिल । सहमतिया निंतिं सरकारं न्ह्यब्वःगु छुं नं विकल्पय् माओवादी सहमत मजूगुलिं निकास पिहांमवःगु धयादिल । वयेकलं माओवादी आन्दोलनय् वंसाः सरकारं सुरक्षा बहाली यायेगु पलाखं लिचिले मज्यूगु सुझाव दलतय्सं सरकारयात ब्यूगु जानकारी बियादिल ।
सेनापतियात थमौती यायेगु राष्ट्रपतिया पलाःया सम्बन्धय् माओवादीं ल्ह्वंगु माग लच्छिया दुने सम्बोधन यायेगु प्रधानमन्त्री माधवकुमार नेपालया प्रतिबद्धता पूमवंगु धासें आन्दोलनया घोषणा यायेवं गठबन्धनया नीनिगू दलं आन्दोलनपाखें उत्पन्न जुइफइगु परिस्थितिलय् छप्पँ जुइमाःगु निष्कर्ष बैठकं पिकाःगु दु ।
बैठकय् राष्ट्रपतिया पलाःया बारे माओवादीं ल्ह्वंगु माग सम्बोधन यायेत सैनिक ऐन संशोधन यायेफइगु विकल्प बारे नं सहलह जूगु खः ।
प्रधानमन्त्री नेपालं माओवादी नापया सहमति कथं लच्छिया दुने प्यंगू बुँदे माग पूवंकेगु बारे व्यवस्थापिका संसदय् सम्बोधन यानाः थःगु प्रतिबद्धता प्वंकादीगु खः ।
उखे माओवादीया अध्यक्ष पुष्पकमल दाहाल 'प्रचण्डं' शुक्रवाः निसें शुरु जुइगु आन्दोलनय् सरकारं दमन याये फइगु धासें प्रतिरोधया निंतिं तयरा जुयाच्वनेत कार्यकर्तातय्त निर्देशन बियादीगु दु ।
बिहीवाः पोखराय् मगरत-तमुवान राज्य समितिया कार्यकर्तातय्त प्रशिक्षण बीगु ज्याझ्वःलय् वयेकलं आः तक सरकारया गतिविधि स्वयेवलय् सरकारं दमन यायेगु रणनिति काइगु सम्भावना अप्वःगुलिं कार्यकर्तातय्त प्रतिरोधया निंतिं तयार जुयाच्वनेत निर्देशन बियादीगु खः ।
