खुम्हेसित स्याम्ह कारचालक विप्लवयात प्रहरीपाखें सार्वजनिक
भोटाहिटीइ खुम्हेसिया ज्यान वनीगु कथं कार दुर्घटना याम्ह कार चालक विप्लवमान सिंहयात प्रहरीं सार्वजनिक याःगु दु । महानगरीय प्रहरी परिसर हनुमानढोकां बिहीवाः छगू पत्रकार सम्मेलन यानाः कार चालक विप्लवयात सार्वजनिक याःगु खः ।
विप्वलवं चलेयानावःगु बा. ४. च. ८०३० नम्बरया कारं ठक्कर बियाः मंगलवाः चान्हय् न्याम्ह भारतीय नागरिक व छम्ह नेपाली नागरिक सीगु खसाः मेम्ह छम्ह भारतीय नागरिक घाःपाः जूगु खः ।
कार दुर्घटना लिपाः फरार जुम्ह खिचापोखररी निवासी विप्लवं बुधवाः बहनी प्रहरी समक्ष आत्मसमर्पण याःगु खः । विप्लवं मादक पदार्थ सेवन यानाः तेज गतिइ कार ब्वाकूगु व मोटरसाइकलयात ओभर टेक यावलय् दुर्घटना जूगु बयान प्रहरी समक्ष ब्यूगु दु ।
विप्लवयात सार्वजनिक यायेत ग्वसाःग्वःगु पत्रकार सम्मेलनय् महानगरिय प्रहरी परिसर येँया प्रमुख प्रहरी उपरीक्षक नवराज सिलवालं तीव्र गतिया कारण दुर्घटना जूगु प्रारम्भिक निश्कर्ष थःपिंसं पिकानाःगु व विस्तृत अनुसन्धान जुयाच्वंगु जानकारी बियादिल ।
दुर्घटना लिपा विप्लव बिस्यूवंना थः पासाःया ढल्कोय् च्वंगु छेँय् वनाः सुलाच्वंगु खः । विप्लवयात आः हनुमानढोकाया प्रहरी परिसरय् तयाः थप अनुसन्धान न्ह्याकूगु खँ प्रहरीं धाःगु दु ।
